15 Jul 2018

एमपीसी न्यूज - वडगाव कातवी नगरपंचायतची पहिली सार्वत्रिक निवडणूक आहे. या निवडणुकीचे मतदान आज (रविवार) आहे. सकाळपासून मुसळधार पाऊस सुरू असून अशा वातावरणात मतदान उत्स्फूर्त प्रतिसादात सुरु आहे. दुपारी दीड वाजेपर्यंत 53.12 टक्के इतके मतदान झाले. 

वडगाव कातवी ग्रुप ग्रामपंचायत बदलून मागील काही महिन्यांपूर्वी वडगाव कातवी नगरपंचायत करण्यात आली आहे. त्यानंतर होणारी ही पहिलीच सार्वत्रिक निवडणूक आहे. त्यामुळे पहिला नगराध्यक्ष किंवा पहिला सदस्य होण्यासाठी सर्वच पक्षांच्या उमेदवारांनी कंबर कसली आहे. निवडणुकीदरम्यान कुठलाही अनुचित प्रकार घडू नये यासाठी मोठा पोलीस बंदोबस्त तैनात करण्यात आला आहे. 

वडगाव आणि मावळ परिसरात मुसळधार पाऊस सुरू असून भर पावसात मतदार जनता रेनकोट, छत्री घेऊन मतदानासाठी बाहेर पडले आहेत. ज्यांच्याकडे कार आहे, असे नागरिक शेजाऱ्यांना घेऊन मतदान केंद्रावर जाताना दिसत आहेत. मतदान केंद्राबाहेर मतदार नागरिकांच्या रांगा लागल्या आहेत.

13 Jul 2018
एमपीसी न्यूज - वडगाव-कातवी नगरपंचायत समितीची पहिली सार्वत्रिक निवणूक रविवार (दि. 15) रोजी होणार आहे. पहिलीच निवडणूक असल्याने सर्वच उमेदवारांनी प्रचारासाठी कंबर कसली आहे. श्री पोटोबा महाराज नगर विकास आघाडीने आपला वचननामा जाहीर केला आहे. आघाडीचा वचननामा पुढीलप्रमाणे -
 
वडगाव कातवी या शहराचा ग्रामीण चेहरा बदलत असून शहरीकरणाकडे वाटचाल सुरु आहे. पुढे 30 वर्षात वडगाव शहराचा होणारा विस्तार लक्षात घेऊन व शहराजवळ नवीन येणारे मोठे गृहप्रकल्प आणि औद्योगिकरण लक्षात घेता आम्ही शहराचा चेहरा मोहरा बदलण्याचा प्रयत्न करीत आहोत. वडगाव कातवी नगरपंचायतीची पहिली निवडणूक वडगावच्या इतिहासातील ऐतिहासिक निवडणूक असल्याने श्री पोटोबा महाराज नगर विकास आघाडी शब्द देत आहे. आघाडीला वडगावकर नागरिकांनी भरीव सहकार्य केल्यास श्री पोटोबा महाराज नगरविकास आघाडीकडून पुढील पाच वर्षात विविध विकासकामे करण्यात येणार आहेत.
 
# नगरपंचायतीची नवीन वास्तू - पुणे जिल्ह्यातच नव्हे तर महाराष्ट्रात नसेल अशी नगरपंचायतीची अद्ययावत सोयी-सुविधांयुक्त सुसज्ज इमारत येत्या दोन वर्षात उभी करण्याचा मानस आहे.
# शासकीय रुग्णालय - वडगावकर तसेच मावळातील गोर-गरीब जनतेला सुलभ व सवलतीमध्ये उपचार मिळावेत यासाठी भव्य सर्व सोयींयुक्त रुग्णालय बांधण्याचा मानस आहे. जेणेकरून नागरिकांना तळेगाव, सोमाटणे, पिंपरी-चिंचवडला जावे लागणार नाही.
# बंदिस्त गटारे - वडगावकर नागरिकांना डासांपासून त्रास होऊ नये व अपघात होऊ नये त्यासाठी बंदिस्त गटारे संपूर्ण वडगाव शहरात राबविण्याचा मनोदय येत्या वर्षभरात पूर्ण करणार आहे.
# स्वच्छ पाणी - सर्व वडगावकर नागरिकांना स्वच्छ पाणी मिळण्यासाठी नवीन वॉटर फिल्टर प्लांट उभारणार आहे. दिवसातून दोन वेळेला स्वच्छ व वेळेवर पाणी देण्याचा निर्धार केला आहे.
# विद्यार्थ्यांच्या सुरक्षेसाठी स्कायवॉक - राष्ट्रीय महामार्ग क्रमांक चार जवळील न्यू इंग्लिश स्कूलमध्ये जाणा-या मुलामुलींना अनेक वेळा अपघातास सामोरे जावे लागलेले आहे. त्यांनी जीव मुठीत घेऊन शाळेत जाऊ नये, यासाठी कुडेवाडा, टेल्को कॉलनी पासून तसेच भेगडे लॉन्स पासून ते न्यू इंग्लिश स्कूल पर्यंत स्कायवॉक तयार करण्याचा आघाडीचा मनोदय आहे.
# महिला बचत गटासाठी - वडगाव शहरातील महिला बचत गटासाठी नवीन तंत्रज्ञानाचे प्रशिक्षण देण्यास व आर्थिक साहाय्य मिळवून देण्यासाठी व त्यांनी उत्पादित केलेल्या वस्तूंसाठी बाजारपेठ उपलब्ध करून देण्यास मदत केली जाईल.
# खेळाडूंसाठी - वडगावमध्ये खेळाडू तयार होण्याची एक देणगीच मिळालेली आहे. त्यात अनेक राष्ट्रीय पातळीवरील खेळाडू तयार झालेले आहेत. आणखी खेळाडू तयार होण्यासाठी वडगावमध्ये असलेली सह्याद्री जिमखाना, महाराष्ट्र जिमखाना, फ्रेंड्स जिमखाना, दुबेज गुरुकुल, सूर्योदय जिम, जय बजरंग तालीम येथे अत्याधुनिक सुविधा उपलब्ध करून देण्याचा मनोदय आहे.
# कच-याचा प्रश्न - वडगावकर नागरिकांना एक भेडसावणारा प्रश्न म्हणजे कच-याचा प्रश्न असून त्यासाठी अद्ययावत घनकच-याचा प्रकल्प उभारून त्यावर प्रक्रिया करून कंपोस्ट खत निर्माण करून त्यांचा वडगावकर शेतकरी बांधवांना उपयोग होईल. असे व्यवस्थापन करण्यात येईल. प्रभागातील घंटागाडीचे नियोजन केले जाईल.
# सार्वजनिक शौचालय - वडगाव शहरात गरजेनुसार ठीक ठिकाणी अद्ययावत सार्वजनिक शौचालक बांधण्याचा मनोदय असून शहरात विविध कामानिमित्त येणा-या नागरिकांना त्याचा उपयोग होईल.
# कुस्ती संकुल व क्रीडा संकुल - वडगाव पंचक्रोशीतील तरुणांना कुस्ती खेळासाठी अद्ययावत कुस्ती संकुलाची उभारणी व क्रिकेट, कबड्डी, फुटबॉल, हॉलीबॉल अशा विविध खेळांसाठी भव्य क्रीडा संकुल उभारण्याचा मनोदय आहे.
# रेन वॉटर हार्वेस्टिंग प्रकल्प - नवीन गृहप्रकल्पांसाठी वडगावमध्ये नव्याने मोठमोठे गृहप्रकल्प तयार होत आहेत. त्यामध्ये त्या सोसायटींना / गृह प्रकल्पांना रेन हार्वेस्टिंग प्रकल्प राबविण्यास प्रोत्साहित केले जाईल. त्यामुळे वडगावमध्ये पाण्याचे नवीन स्रोत तयार होऊन जमिनीतील पाण्याची पातळी वाढण्यास मदत होईल.
# ऐतिहासिक तळ्याचे सुशोभीकरण - वडगावमधील ऐतिहासिक तळ्याचे सुशोभीकरण करून त्यामध्ये कारंजे (रंगीत / संगीत) बोटिंग चालू करणे. जेणे करून लहान मुले आणि नागरिकांना ते आकर्षित करून पर्यटन स्थळ म्हणून विकसित होईल.
# भाजी मंडई - वडगावकर नागरिकांना रोज स्वच्छ / ताजी भाजी मिळण्यासाठी ऐतिहासिक तळ्याजवळ आधुनिक भाजीमंडई तयार केली जाईल. त्यात वडगावातील (स्थानिक मच्छी विक्रेता) मच्छी मार्केटसाठी जागा उपलब्ध करून देण्याचा मनोदय आहे.
# धर्मशाळा - ग्रामदैवत श्री पोटोबा महाराज मंदिरास तीर्थक्षेत्र / धार्मिक स्थळाचा दर्जा प्राप्त करून देण्यासाठी शासकीय पातळीवर प्रयत्न करणे व मावळ तालुक्याच्या जनतेसाठी धर्मशाळा बांधकाम करून अल्प दरात राहण्याची सोय करणे.
# उद्यान व नाना नानी पार्क - श्रीमंत महादजी शिंदे गार्डनचे सुशोभीकरण करून तेथे वयोवृद्धांना बसण्यासाठी नाना नानी पार्क तसेच शहरामध्ये काही ठिकाणी नवीन उद्याने तयार करण्याचा आघाडीचा मनोदय आहे.
# पार्किंग सुविधा - वडगाव बाजारपेठेतील मुख्य रस्त्यावरील वाहतूक समस्या सोडविण्यासाठी सुसज्ज पार्किंग व्यवस्था करण्याचा आघाडीचा मनोदय आहे.
# वडगाव कातवी जोडरस्ता - वडगाव शहर व कातवी गावाला जोडणारा जुना रस्ता पुन्हा सुरु करून त्याचे डांबरीकरण करण्याचा मनोदय आहे. तसेच कातवी गावात हायमस्ट दिवे बसवणार आहे.
# स्मशानभूमी - कातवी गावासाठी स्मशानभूमी व दशक्रिया विधीसाठी कायम स्वरूपी शेड उभारणे व स्मशानभूमीचे सुशोभीकरण करण्याचा आघाडीचा मनोदय आहे.
# एस टी आगार - राष्ट्रीय महामार्ग क्रमांक चार जवळच शासकीय जागेत एसटी चे आगार उभारण्याचा मनोदय असून तेथे मुंबई, पुणे, सोलापूर, कोल्हापूर इत्यादी शहरांकडे जाणा-या एसटी थांबल्या जातील अशी सोय करणे.
# सीसीटीव्ही - वडगाव शहरात गर्दीच्या ठिकाणी व महत्वाचे ठिकाणी नगरपंचायतीच्या वतीने सीसीटीव्ही बसविण्याचा आघाडीचा मनोदय आहे. त्याचा फायदा शहरातील कायदा व सुव्यवस्था राखण्यासाठी मदत होईल.
# वायफाय सेवा - वडगाव शहरात कोर्ट / कचेरी कामासाठी बाहेरगावाहून अनेक व्यक्ती येत असतात. वडगाव शहरात आधुनिकतेची कास धरण्यासाठी, सोशल मीडियाची माहिती सर्व नागरिकांसाठी पोहोचण्यासाठी वडगाव न्याय मंदिर परिसर, तहसीलदार कचेरी, रेल्वे स्टेशन यांसारख्या ठिकाणी मोफत वायफाय सेवा पुरविण्याचा मनोदय आहे.
# मलनिःसारण केंद्र - शहरातील सांडपाण्यामुळे होणारे नदीचे प्रदूषण टाळण्यासाठी मलनिःसारण केंद्र उभारून जल शुद्धीकरण करून ते पाणी योग्य त्या ठिकाणी वापरले जाईल. त्यामुळे पाण्याची बचत होईल.
# वाचनालय - शहरातील नागरिक व विद्यार्थ्यांसाठी अद्ययावत वाचनालय सुरु करण्याचा आघाडीचा मनोदय आहे.
 
यापूर्वी केलेली ठळक कामे -
यापूर्वी वडगाव शहराच्या सार्वजनिक विकासासाठी काँग्रेस / राष्ट्रवादी काँग्रेस पक्षाच्या वडगाव शहरविकास समितीच्या माध्यमातून भरीव काम केलेले आहे. त्याची पोचपावती म्हणून वडगाव ग्रामपंचायतीत 20-22 वर्षे विकास समितीची सत्ता होती. समाजोपयोगी कामे केलेला हा दावा नाही, तर समाजासाठी उचललेला खारीचा वाटा आहे.
# सूर्योदय जिम व अंगणवाडी
# मोरया उद्यान
# सूर्योदय अद्ययावत व्यायामशाळा
# रेल्वे गेटकडे जाणा-या रस्त्याचे काँक्रीटीकरण
# वैकुंठ स्मशानभूमी सुशोभीकरण
# वडगावच्या भाजी मांडईची उभारणी
# पाण्याची टाकी
# केशवनगर स्वागत कमान
# केशवनगर रेल्वे भुयारी मार्ग
 
यापूर्वी वचननाम्यात दिलेली वचने वडगाव शहर विकास समितीच्या माध्यमातून पूर्ण केली आहेत. वडगाव शहराची ही ऐतिहासिक निर्णयाची लढाई आहे ती श्री पोटोबा महाराज नगर विकास आघाडी जिंकणारच व निवडून आल्यानंतर वरील कामे पाच वर्षात पूर्ण करण्याचा वडगावकर नागरिकांना देत असलेला शब्द पाळण्यासाठी आम्ही कटिबद्ध आहोत.
श्री पोटोबा महाराज नगर विकास आघाडीचे उमेदवार -
नगराध्यक्ष पदासाठी - पंढरीनाथ राजाराम ढोरे (चिन्ह - गॅस सिलेंडर)
प्रभाग क्रमांक 1 - दशरथ दुंदा केंगले (चिन्ह - कमळ )
प्रभाग क्रमांक 2 - दिनेश गोविंदराव ढोरे (चिन्ह - कमळ)
प्रभाग क्रमांक 3 - अश्विनी नितीन तुम्कार (चिन्ह - कमळ)
प्रभाग क्रमांक 4 - राहुल रामचंद्र ढोरे (चिन्ह - घड्याळ)
प्रभाग क्रमांक 5 - रेखा विलास दंडेल (चिन्ह - अंगठी)
प्रभाग क्रमांक 7 - चंद्रजीत दिनकर वाघमारे (चिन्ह घड्याळ)
प्रभाग क्रमांक 8 - माया अमर चव्हाण (चिन्ह -घड्याळ)
प्रभाग क्रमांक 9 - दिलीप सुधाकर पगडे (चिन्ह - छताचा पंखा)
प्रभाग क्रमांक 10 - प्रमिला राजेश बाफना (चिन्ह - घड्याळ)
प्रभाग क्रमांक 11 - सिद्धेश्वर पुरुषोत्तम झरेकर (चिन्ह - घड्याळ)
प्रभाग क्रमांक 12 - गणेश सोपानराव म्हाळसकर (चिन्ह - घड्याळ)
प्रभाग क्रमांक 13 - पौर्णिमा गणेश भांगरे (चिन्ह - घड्याळ)
प्रभाग क्रमांक 14 - वैशाली गौतम सोनवणे (चिन्ह - घड्याळ)
प्रभाग क्रमांक 15 - संतोष नंदकुमार चव्हाण (चिन्ह - घड्याळ)
12 Jul 2018

वडगाव मावळ नगरपंचायत निवडणुक मतमोजणी 20 जुलै रोजी

एमपीसी न्यूज - राज्य निवडणूक आयोगाने नुकताच एक निर्णय जाहीर केला आहे. त्यानुसार वडगाव कातवी नगरपंचायतीच्या निवडणूक मतमोजणीची तारीख 16 जुलै वरून 20 जुलै करण्यात आली आहे. त्यामुळे  वडगावकारांना आपला नवीन नगराध्यक्ष समजण्यासाठी मतदानानंतर चार दिवस आणखी प्रतीक्षा करावी लागणार आहे.

वडगाव कातवी नगरपंचायतीची निवडणूक 15 जुलै रोजी होणार आहे. तर नागपूर जिल्ह्यातील वानाडोंगरी नगरपरिषदेची निवडणूक 19 जुलै रोजी होणार आहे. वडगाव कातवी नगरपंचायत निवडणुकीच्या निकालाचा परिणाम वानाडोंगरी नगरपरिषदेच्या निकालावर होऊ नये, यासाठी निवडणूक आयोगाने ही खबरदारी घेतली असून वडगाव कातवी नगरपंचायत निकालाची तारीख पुढे ढकलली आहे. 

राज्य निवडणूक आयोगाने मतमोजणी 16 जुलै ऐवजी 20 जुलै रोजी होणार असल्याचे आदेश जारी केले आहेत. वानाडोंगरी नगर परिषद निवडणुकीच्या मतदान व मतमोजणीच्या दिनांकाबाबत सुधारित निवडणूक कार्यक्रम जाहीर केल्याने इतर नगरपंचायत निवडणूक निकालाचा परिणाम टाळण्यासाठी वडगाव नगरपंचायतींच्या मतमोजणीची तारीख पुढे ढकलण्याचा निर्णय घेण्यात आला आहे. वडगाव नगरपंचायत बरोबरच मुक्ताईनगर,बार्शिटाकळी व पारशिवनी या तीन नगरपंचायतींच्या निवडणुकांच्या मतमोजणीच्या तारखा बदलण्यात आल्या आहेत.

12 Jul 2018

एमपीसी न्यूज - तळेगाव मधील शाळा-महाविद्यालयासमोर हुल्लडबाजी करत विनापरवाना मोटरसायकल चालविणा-या सात मुलांवर कारवाई करण्यात आली. तर काही मुलांना पालकांसमक्ष समज देण्यात आली.

तळेगाव मधील शाळा-महाविद्यालयासमोर काही अल्पवयीन मुले मोटरसायकल घेऊन थांबतात. तसेच काही मुले शाळा-महाविद्यालयाच्या आवारात वारंवार ये-जा करत असतात. यावर कारवाई करत तळेगाव पोलीसांनी सात मुलांना ताब्यात घेतले. मुलांकडे वाहन चालविण्याचा परवाना याबाबत चौकशी केली असता, कागदपत्रे नसल्याचे आढळले. त्यामुळे ताब्यात घेतलेल्या मुलांना वडगाव न्यायालयात हजर केले. न्यायालयाच्या आदेशानुसार मुलांकडून चार हजार रुपयांचा दंड वसूल करण्यात आला.

ही कारवाई पोलिस निरीक्षक संतोष गिरीगोसावी यांच्या मार्गदर्शनाखाली सहाय्यक पोलिस निरीक्षक डी. बी. बाजिगरे, पोलिस हवालदार डी. एस. हत्ते, पोलिस काॅन्स्टेबल व्ही. सी. वडेकर, पोलिस नाईक विश्वास पोटील यांच्या पथकाने केली.

12 Jul 2018

एमपीसी न्यूज - मावळ तालुक्यातील टाकवे बुद्रुक येथील एका चिकन विक्रेत्याकडे संरक्षणासाठी दहा लाख रुपयांची मागणी केली. हा प्रकार बुधवारी (दि. 11) दुपारी दोनच्या सुमारास घडला.

उमर उस्मान मकबूल शेख (वय 38, टाकवे बुद्रुक, ता. मावळ) यांनी याप्रकरणी वडगाव मावळ पोलीस ठाण्यात फिर्याद दिली. त्यानुसार बाजीराव सुदाम खुरसुले (खुरसुलेवाडी निगडे, ता. मावळ) याच्याविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी यांचे टाकवे बुद्रुक येथे चिकन विक्रीचे दुकान आहे. बुधवारी दुपारी दोनच्या सुमारास बाजीराव याने शेख यांना फोन केला. फोनवर बाजीराव याने शेख यांच्याकडे त्यांच्या संरक्षणासाठी दहा लाख रुपयांची मागणी केली. तसेच याबाबत पोलिसांना सांगितल्यास गोळ्या घालून ठार मारण्याची धमकी देखील दिली. यावरून गुन्हा दाखल करण्यात आला आहे. वडगाव मावळ पोलीस तपास करीत आहेत.

11 Jul 2018
एमपीसी न्यूज - तळेगाव येथील इंद्रायणी विद्यामंदिर संस्थेच्या इंद्रायणी महाविद्यालयाच्या वाणिज्य शाखेत प्रथम वर्षांसाठी प्रवेश घेतलेल्या विद्यार्थ्यांचे महाविद्यालयाच्या वाणिज्य विभागातर्फे स्वागत करण्यात आले. महाविद्यालयात नव्याने प्रवेश घेतलेल्या सर्व विद्यार्थ्यांचे गुलाबपुष्प देवून महाविद्यालयाचे प्राचार्य डॉ. संभाजी मलघे यांनी स्वागत केले.
 
सदर कार्यक्रम प्रसंगी अध्यक्ष स्थानी महाविद्यालयाचे प्राचार्य डाॅ. संभाजी मलघे, प्रा. बी. के. रसाळ, प्रा. डी. पी. काकडे, प्रा. आर. आर. भोसले, नॅक समन्वय प्रा. के. व्ही. अडसुळ, प्रा. एम्. व्ही. देशमुख, क्रिडा विभाग प्रमुख प्रा. एस्. आर. थरकुडे, डाॅ. एस. एस. मेंगाळ, जनसंपर्क अधिकारी प्रभाकर तुमकर आदी उपस्थित होते.
 
विद्यार्थ्यांना मार्गदर्शन करताना विद्यार्थ्यांचा पारंपारिक शिक्षणाकडून आधुनिक शिक्षणाकडे कल दिसतो. उच्च शिक्षण पध्दतीमध्ये माहिती तंत्रज्ञान शिक्षणावर भर देत महाविद्यालयामध्ये लवकरच व्हर्चुअल क्लासरुम तयार करण्यात येणार आहे. विद्यार्थ्यांना आधुनिक शिक्षण प्रवाहामध्ये आणण्यासाठी महाविद्यालय कटिबध्द आहे. महाविद्यालयात विद्यार्थ्यांच्या सर्वांगीण विकासासाठी अनेक योजना असून विद्यार्थ्यांनी त्याचा फायदा घ्यावा, असे मत डॉ. संभाजी मलघे यांनी व्यक्त केले.
 
तसेच प्रा. डी. पी. काकडे यांनी वाणिज्य विभागातील अभ्यासक्रमाचा उलगडा करुन विविध विभागातील संधीची माहीत दिली. प्रा. के .व्ही. अडसुळ यांनी विद्यार्थ्यांना वाणिज्य विभागातील विविध सर्टिफिकेट कोर्सची माहीती देवून स्पर्धा परीक्षेत वाणिज्य विभागातील विद्यार्थ्यांना संधी उपलब्ध असल्याचे सांगितले. त्या अनूषंगाने महाविद्यालयात स्पर्धापरिक्षा मार्गदर्शन  केंद्र उपलब्ध असून त्याचा फायदा घ्यावा असे मत व्यक्त केले.
 
कार्यक्रमात विद्यार्थ्यांनी मनोगते व्यक्त केली. प्रास्तविक प्रा. डी. पी. काकडे यांनी केले. सूञसंचालन प्रा. पी. के. पानकर यांनी केले. कार्यक्रम यशस्वी करण्यासाठी प्रा. आर. आर. भोसले  व वाणिज्य विभागातील प्राध्यापक यांनी परिश्रम घेतले.
11 Jul 2018
एमपीसी न्यूजजांबवडे गावच्या सरपंचपदी सारीका अनिल घोजगे तर उपसरपंचपदी अंकुश रामचंद्र घोजगे यांची बिनविरोध निवड झाली. उद्योजक देवीदास गायकवाड यांनी नवनिवार्चित सदस्यांचे अभिनंदन केले.
 
नुकत्याच पार पडलेल्या जांबवडे ग्रामपंचायत निवडणुकीत सदस्यपदी स्वाती बाळासाहेब शिंदे, वैशाली विकास भांगरे यांची बिनविरोध निवड झाली. जगन्नाथ नाटक पाटिल, पाडुंरग घोजगे, भरत घोजगे, आनंदा शिंदे, सतोष घोजगे, माजी ग्रामपंचायत सदस्य अंकुश भागंरे, सचिन शिदे, पपु नाटक, सागर शिदे, सोपान भांगरे, राष्ट्रवादी काँग्रेस सहकार सेल अध्यक्ष योगेश नाटक, लहु घोजगे, सुनिल घोजगे, आनिल घोजगे, भास्कर भांगरे, राजु घोजगे, आतुल नाटक, मगेश भोसले आदींनी विजयी उमेदवारांना शुभेच्छा दिल्या.
11 Jul 2018
एमपीसी न्यूज - मावळातील सांगवडे गावात मंगळवारी (10 जुलै) बिबट्याचा वावर आढळल्याने ग्रामस्थांमध्ये घबराट पसरली आहे. सांगवडे गावातील शेतकरी भिमराव राक्षे यांचा पाळीव कुत्रा बिबट्याने फस्त केल्याचे ग्रामस्थांचे म्हणणे असून या बिबट्याला ताबडतोब जेरबंद करण्याची मागणी त्यांनी केली. 
 
सांगवडे गावातील रहिवाशी भिमराव राक्षे यांच्या घराशेजारी बिबट्याच्या पायाचे ठसे आढळले आहेत. राक्षे यांच्या म्हणण्यानुसार, मंगळवारी रात्री जनावरांच्या धडपडीने ते जागे झाले होते. पंरतू कुत्र्यांच्या भुंकण्याच्या आवाजामुळे ते परत झोपले. सकाळी ते जेव्हा झोपेतून उठले तेव्हा त्यांचा एक कुत्रा गायब असल्याचे निदर्शनास आले. त्यानंतर आजुबाजूला त्याचा शोध घेत असताना बिबट्याच्या पायांचे ठसे आढळले. त्यावरून कुत्र्याला बिबट्या घेउन गेल्याचे त्यांचे म्हणणे आहे. 
 
दरम्यान बिबट्या असल्याची माहिती ग्रामस्थांनी वनविभागाला कळविल्यानंतर वडगाव वन विभागाचे कर्मचारी गायकवाड यांनी आज सांगवडे गावाला भेट दिली. त्यांना घटनास्थळी बिबट्यासदृस्य प्राण्याच्या पायाचे ठसे आढळले. परंतू ते बिबट्याच्याच पायाचे ठसे आहेत का? हे तपासणीअंती स्पष्ट होईल, असे त्यांनी सांगितले.
 
तीन आठवड्यापुर्वी सांगवडे गावापासून जवळच असलेल्या नेरे गावात बिबट्याचा वावर आढळला होता. त्याला पकडण्यासाठी त्या परिसरात पिंजराही लावण्यात आला होता, परंतू त्याचा काही उपयोग झाला नाही. सांगवडे गावात उसाची लागवड मोठ्या प्रमाणात असल्यामुळे हाच बिबट्या या भागात आला असल्याची शक्यता गायकवाड यांनी वर्तवली. ग्रामस्थांनी सतर्क राहण्याचे आवाहन त्यांनी केले.  

11 Jul 2018

एमपीसी न्यूज - वडगाव मावळ नगरपंचायतची निवडणूक लढवत असताना विरोधक किंवा मतभिन्न लोकांवर आरोपांची चिखलफेक न करता केवळ नागरिकांच्या कामासाठी वेळ देत वडगावच्या विकासाचे राजकारण करत आहे. ज्यांना चिखलफेक करायची त्यांनी खुशाल करावी, वडगावकर त्यांना याबाबत योग्य ती शिक्षा देईल, असा विश्वास श्री पोटोबा महाराज नगर विकास आघाडीचे नगराध्यक्ष पदाचे उमेदवार ढोरे यांनी व्यक्त केला.

काँग्रेसमध्ये असताना वडगाव कातवी नगरपंचायतीच्या निवडणुकीबाबत पक्षाची धोरणे निश्चित झाली नाहीत. त्याचा थेट परिणाम निवडणुकीवर होईल आणि वडगावचा विकास खुंटेल यासाठी काँग्रेस सोडली. त्यानंतर भाजपमध्ये असताना वैचारिक मतभेत झाले. त्यामुळे समविचारी कार्यकर्ते आणि सहका-यांना एकत्र करून श्री पोटोबा महाराज नगर विकास आघाडीची स्थापना करण्यात आली. आघाडीमध्ये राष्ट्रवादी पक्षाचे नऊ, भाजपचे तीन आणि अपक्ष दोन अशा एकूण 14 उमेदवारांना घेऊन पहिली नगरपंचायत निवडणूक लढवीत आहे. वडगाव कातवी नगरपंचायत प्रभाग क्रमांक एक, दोन आणि तीन मधील जनता व्यक्तिनिष्ठ आहे. त्यामुळे आघाडीच्या उमेदवारांची चिन्हे जरी वेगळी असली तरी वडगावकर त्यांच्या कामाला पसंती देणार आहेत. चिन्हांपेक्षा व्यक्ती महत्वाचा आहे. त्या व्यक्तीचे काम महत्वाचे आहे. तसेच पंढरीनाथ ढोरे यांचे समर्थक म्हणून देखील उमेदवारांना मतांचं पाठबळ मिळणार आहे. त्यातून श्री पोटोबा महाराज नगर विकास आघाडीचा विजय निश्चित आहे.

श्री पोटोबा महाराज नगर विकास आघाडी व्हाया काँग्रेस, भाजप पक्ष, या प्रवासाबद्दल विचारले असता पंढरीनाथ ढोरे म्हणाले, काँग्रेस सोडण्यापूर्वी पक्षश्रेष्ठींशी चर्चा केली होती. त्यावेळी त्यांना सांगितले होते की राष्ट्रवादी आणि अन्य समविचारी पक्ष व कार्यकर्त्यांना घेऊन आघाडी करायला हवी. पूर्वकल्पना देऊन देखील पक्षश्रेष्ठींनी वेळीच योग्य निर्णय घेतला नाही. काँग्रेसला वेगळी चूल मांडायची होती. ही काँग्रेसची भूमिका माझ्यासारख्या संघर्षातून पुढे आलेल्या कार्यकर्त्याला पटली नाही. त्यामुळे नाईलाजाने काँग्रेसमधून बाहेर पडलो. भाजपमध्ये गेल्यानंतर प्रवेशापूर्वीच काही अटी आणि शर्ती ठेवण्यात आल्या होत्या. त्यासाठी भाजपने आश्वासन दिले. पण भाजपने आश्वासन पाळले नाही. त्यानंतर काही समविचारी सहकारी आणि कार्यकर्त्यांनी मिळून मला लढण्यासाठी पाठिंबा दिला. भाजपमधून बाहेर पडत असताना माझे समर्थक आणि राष्ट्रवादीचे काही उमेदवार तसेच अपक्ष काही उमेदवारांनी पाठिंबा देऊन आघाडीची स्थापना केली.

मतांचं राजकारण करण्यासाठी कसलेही आरोप करून वडगावकरांच्या मनात माझी प्रतिमा मालिन करण्याचा कुटील डाव विरोधक रचत आहेत. हा डाव टाकत असताना याचा चिखल त्यांच्याच अंगावर उडत असल्याचे त्यांच्या लक्षात येत नाही. अतिशय खालच्या पातळीवर जाऊन राजकारण केले जात आहे. जनतेला सत्य परिस्थिती माहिती आहे. त्यामुळे जनता योग्य विचार करून श्री पोटोबा महाराज नगर विकास आघाडीच्याच उमेदवारांना निवडून देतील, असा विश्वासही पंढरीनाथ ढोरे यांनी व्यक्त केला.

वडगाव कातवी मधील नागरिकांसाठी 'आधी केलं मग सांगितलं'
गावामध्ये अंतर्गत डांबरी, सिमेंट कॉंक्रिटचे रस्ते, भूमिगत गटारे, लाईट, स्मशानभूमीसाठी 'भूखंड' अल्पदरात मिळवून दिला. स्मशानभूमीचे संपूर्ण सुशोभीकरण केले. वडगाव मधील ऐतिहासीक तळ्याचे सुशोभीकरण केले. वडगाव हे मावळ तालुक्याचे ठिकाण आहे. त्यामुळे संपूर्ण तालुक्यातील नागरिकांची वडगाव मध्ये वर्दळ असते. वडगावच्या येणा-या सर्व नागरिकांचे स्वागत करणारी कमान उभारली. गावातील सर्व मंदिर उभारणी, सामाजिक कामे यांमध्ये वेळोवेळी सक्रिय सहभाग घेतला.

ग्रामपंचायतीमध्ये उपसरपंच म्हणून शहरामध्ये विविध विकासकामे केली. इयत्ता पाचवीपर्यंत जिल्हा परिषदेची शाळा उभारली. दोन अंगणवाड्या नव्याने सुरु केल्या. व्यायामशाळा, महादजी शिंदे स्मारकाचे लायन्स क्लबच्या सहकार्याने शुशोभीकरण केले. 40 वर्ष रखडलेला मधुबन कॉलनी मधील रस्ता मार्गी लावला. शेतक-यांना शेती अवजारे, खते, बी-बियाणे मिळूवन देण्यासाठी वेळोवेळी प्रयत्न केला आहे. शेतीवर लक्ष केंद्रित करून मावळ तालुक्यातील सर्वोत्कृष्ठ ऊस उत्पादक पुरस्कार मिळविला.

केशवनगर, सांगवी,  राजपुरी, बेलज भागातील ग्रामस्थांना रेल्वे फाटकाचा मोठा अडथळा ठरत होता. नागरिकांच्या सोयीसाठी भुयारी मार्ग मंजूर करून घेतला. भयारि मार्गाचे काम जोरात सुरु आहे. ब्लॉक बनवून तयार आहेत. पाऊस संपल्यानंतर लगेच भुयारी मार्गाचे काम मार्गी लागणार आहे. मावळ तालुक्यातील गरीब कुटुंबातील मुला-मुलींच्या लग्नासाठी स्व. कै. केशवराव ढोरे प्रतिष्ठान सुरु केले. प्रतिष्ठानच्या माध्यमातून सामुदायिक विवाह सोहळ्याचा उपक्रम राबविला. मागील पाच वर्षात 65 जोडपी याअंतर्गत विवाहबद्ध झाली आहेत.ग्रामपंचायत सदस्यांना स्वेटरचे वाटप करण्यात आले.

मावळ तालुका खरेदी विक्री संघाचा उपाध्यक्ष म्हणून काम करताना, ना नफा ना तोटा या तत्वावर मावळ तालुक्यातील सुप्रसिद्ध इंद्रायणी तांदळाला बाजारपेठ मिळवून दिली. मागील काही दिवसांपूर्वी वडगाव ग्रामपंचायतीने सरसकट केलेली पाणीपट्टीतील वाढ ही वडगावकरांसाठी जीवघेणी होती. त्यामुळे गावक-यांना एकत्र करून विशेष ग्रामसभेचे आयोजन केले. त्यामध्ये सरसकट पाणीपट्टी न घेता नळजोडणी प्रमाणे पाणीपट्टी घेण्याचा ठराव केला. यामुळे वडगावकरांवरील मोठे संकट टळले आहे.

पुढे काय करणार -

# भव्य क्रीडासंकुल
# ज्येष्ठ नागरिकांसाठी नाना-नानी पार्क
# महिला आणि लहान मुलांसाठी उद्याने
# भाजी मंडईचे शुशोभीकरण
# पोटोबा मंदिरासमोरील ओढ्यावर पाईप लाईन टाकून बंदिस्त ओढा करणे
# वाचनालय
# प्राथमिक आरोग्य केंद्र
# भव्य वाहनतळ

11 Jul 2018
विरोधकांचाही सन्मान करण्याची आमची परंपरा; पंढरीनाथ ढोरे यांचे स्पष्टीकरण
 
एमपीसी न्यूज - वडगाव मावळ मधील केशवनगर येथे झालेल्या तथाकथित भांडण आणि शिवीगाळ प्रकरणी मला विनाकारण गोवण्यात आले आहे. घटना घडली की नाही, याबाबत अजूनही मी साशंक आहे. घटना घडताना मी घटनास्थळी उपस्थित नसताना देखील आरोपींच्या यादीत नाव देण्यात आले आहे. हा विरोधकांचा पूर्वनियोजित कट असून केवळ मतांचं राजकारण करण्यासाठी असा प्रकार झाला असल्याचे स्पष्टीकरण श्री पोटोबा महाराज नगर विकास आघाडीचे नगराध्यक्ष पदाचे उमेदवार पंढरीनाथ ढोरे यांनी मांडले.
 
आमच्या भागात प्रचार करण्यासाठी यायचे नाही, असे म्हणत दोन गटात शाब्दिक चकमक उडाली. यातून कार्यकर्त्यांमध्ये किरकोळ हाणामारी झाली. अशा प्रकारची फिर्याद वडगाव मावळ पोलीस ठाण्यात दाखल करण्यात आली. हा प्रकार रविवारी (दि. 8) रात्री आठच्या सुमारास केशवनगर येथे घडल्याचे फिर्यादीत म्हटले आहे. त्यानुसार 10 जणांवर गुन्हा दाखल करण्यात आला आहे. याप्रकरणी यशवंत निवृत्ती शिंदे (वय 36, रा. ढोरे वाडा, वडगाव मावळ ता. मावळ) यांनी फिर्याद दिली आहे.
 
फिर्यादीत म्हटले आहे की, फिर्यादी निवृत्ती, माऊली दाभाडे ,किरण ढोरे हे तिघेजण नगराध्यक्ष पदाचे उमेदवार मयुर ढोरे यांच्या प्रचारासाठी केशवनगर मधील पिचड यांच्या घरात चर्चा करीत होते. त्यावेळी पंढरीनाथ ढोरे यांच्या कार्यकर्त्यांनी पिचड यांच्या घरात घुसुन 'आमचे एरियात यायचे नाही' अशी धमकी दिली. निवृत्ती आणि किरण यांना शिवीगाळ करून हाताने मारहाण केली. उमेश याने माऊली दाभाडे यांना शिवीगाळ केली. सर्वांनी मिळून कार्यकर्त्यांना जीवे मारण्याची धमकी दिली.
 
याबाबत स्पष्टीकरण देताना पंढरीनाथ ढोरे म्हणाले, ज्या वेळी ही घटना घडली त्यावेळी मी दत्त नगरी परिसरात प्रचार करत होतो. घटनास्थळी मी हजर नव्हतो. अचानक असा काही प्रकार झाल्याचे फोनवरून समजले आणि त्यानुसार मी तात्काळ पिचड यांच्या घरी पोहोचलो. सर्वांना समजावत तिथून परत आलो. तरीही यशवंत शिंदे यांनी आमच्या विरोधात फिर्याद दिली. यामध्ये माउली दाभाडे यांना शिवीगाळ केल्याचे म्हटले आहे. माउली दाभाडे यांची तालुक्यातील ज्येष्ठ सहकार महर्षी म्हणून ख्याती आहे. ते आमच्यासाठी आदरणीय व्यक्तिमत्व आहेत. त्यांचा प्रत्येक वेळी आम्ही आदर केला आहे. असे असताना आम्ही त्यांना शिवीगाळ करणे किंवा त्यांच्याबाबत चुकीची वक्तव्ये करणे शक्य नाही.
 
विरोधकांनी माउली दाभाडे यांना मानणाऱ्या नागरिकांना पंढरीनाथ ढोरे यांना मत देण्यापासून परावृत्त करण्यासाठी विरोधकांनी हा डाव रचला आहे. माउली दाभाडे यांच्याशी जर कोणत्याही प्रकारचे गैरवर्तन झाले असते, तर त्यांनी स्वतः फिर्याद दिली असती. कार्यकर्त्यांकरवी त्यांनी कामे करून घेतलीच नसती. आमच्या सहकारी, mकार्यकर्ते आणि परिवाराकडून या घटनेबाबत कुठेही वाच्यता करण्यात आलेली नाही. विरोधकांनी स्वतः ही चिखलफेक करून घेतली आहे, असेही पंढरीनाथ ढोरे म्हणाले.
Page 1 of 117

Like what you see?

Close

Hit the buttons below to follow us

0
Shares