• IMG-20170812-WA0103.jpg
  • IMG-20171012-WA0071.jpg
  • IMG-20171013-WA0075.jpg
  • MPC_news.JPG
  • TVS.jpg
21 Nov 2017

पुणे शहर पोलीस दक्षिण विभाग आणि सेवा मित्र मंडळ ट्रस्टतर्फे जिल्हास्तरीय चित्रकला स्पर्धेचे आयोजन 
                                                                                                                                                                         
एमपीसी न्यूज -  मुंबईमध्ये 26/11 रोजी झालेल्या दहशतवादी हल्ल्यातील शहीदांच्या स्मरणार्थ पुणे शहर पोलीस दक्षिण विभाग आणि शुक्रवार पेठेतील सेवा मित्र मंडळ ट्रस्टतर्फे जिल्हास्तरीय चित्रकला स्पर्धेचे आयोजन करण्यात आले आहे. रविवार (दि.26) सकाळी 8.30 वाजता सारसबाग येथे ही स्पर्धा होणार आहे. स्पर्धेकरीता विनामूल्य प्रवेश असून पुणेकरांनी सहभागी व्हावे, असे आवाहन अप्पर पोलीस आयुक्त रविंद्र सेनगावकर यांनी केले.

देशभक्तीपर व पर्यावरण जागृतीच्या कल्पना विद्यार्थ्यांनी चित्रकलेच्या माध्यमातून मांडाव्यात, तसेच विद्यार्थ्यांमध्ये देशभक्ती जागृत होण्यासोबतच शहीदांना श्रद्धांजली अर्पण करण्याकरीता स्पर्धेचे आयोजन करण्यात आले आहे. ही स्पर्धा पहिली ते दहावीच्या विद्यार्थ्यांसाठी तसेच खुल्या गटासाठी आयोजित करण्यात आली आहे. गट अ : 1 ली ते 2 री, गट ब : 3 री ते 4 थी, गट क : 5 वी ते 7 वी, गट ड : ८ वी ते 10 वी आणि खुल्या गटात स्पर्धा होईल. स्पर्धकाने रंग व साहित्य स्वत: आणायचे असून कागद संयोजकांतर्फे देण्यात येणार आहे.

सेवा मित्र मंडळाचे अध्यक्ष वैभव वाघ म्हणाले,  चित्रकला स्पर्धेदरम्यान विविध कलाकार 26/11 वर आधारित लाईव्ह पेंटींग देखील काढणार आहेत. तसेच पोलीस दलातर्फे बँडच्या माध्यमातून शहिदांना आदरांजली अर्पण करण्यात येणार आहे. स्पर्धेत सहभाग घेणा-या प्रत्येकाला प्रशस्तीपत्रक देण्यात येणार आहे. सहभागी होण्यासाठी ९८८११२३५१७, ९९२२९६७८५२, ९८९०९३२६९३, ९८८१७९८१८२, ८८८८७७९३९३ या क्रमांकावर संपर्क साधावा. स्पर्धेचे परीक्षण प्रख्यात शिल्पकार विवेक खटावकर, जयंत टोले, श्रावण जाधव, सुनील बोरले, शेखर देडगावकर हे करणार आहेत. तरी जास्तीत जास्त पुणेकर व विद्यार्थ्यांनी स्पर्धेत सहभाग घ्यावा.
21 Nov 2017


महाराष्ट्र राज्य दारूबंदी जनआंदोलन संघटनेची राज्य उत्पादन शुल्ककडे मागणी

एमपीसी न्यूज - पुणे शहर व जिल्ह्यात वेगवेगळ्या हॉटेल्स व बार रूममध्ये विनापरवाना बेकायदेशीरपणे दारू व बीयर विक्री होत आहे. तसेच विविध ठिकाणी दारूचे अवैधरित्या उत्पादन देखील करण्यात येत आहे. यावर बंदी घालण्याची मागणी महाराष्ट्र राज्य दारूबंदी जनआंदोलनचे पुणे जिल्हाप्रमुख राजेंद्र भोसले व उज्वला झेंडे यांनी राज्य उत्पादन शुल्क विभागाचे उप अधीक्षक फुलपगार यांच्याकडे निवेदनाद्वारे केली आहे. यावेळी महाराष्ट्र राज्य दारूबंदी जनआंदोलन संघटने पुणे जिल्हा कार्याध्यक्ष विनायक सावरकर, निलेश जोशी, संजय बल्लारी, बळीराम वांजळे व संदीप मोरडेकर आदी उपस्थित होते.

महाराष्ट्र राज्य दारूबंदी जनआंदोलन संघटनेकडून देण्यात आलेल्या निवेदनात म्हटले आहे की, पुणे शहर व जिल्ह्यात बनावट दारूची विक्री केली जात आहे. त्यामुळे त्याचा नागरिकांच्या रोग्यावर विपरीत परिणाम होत आहे. विषारी दारूमुळे काहीजणांचा मृत्यू देखील झाला आहे. तर काही लोक रुग्णालयांमध्ये उपचार घेत आहेत. दारूमुळे अनेक कुटुंबे उध्वस्त झाली आहेत. त्या कुटुंबांवर अखेर उपासमारीची देखील वेळ आली आहे.

ग्रामीण भागात व शहरामधल्या झोपडपट्टी भागात राजरोसपणे हातभट्टी व गावठी दारूचे उत्पादन होत आहे. तसेच मद्य उत्पादन कारखान्याकडून विक्रीसाठी मागविलेल्या दारूवरील पॅकिंग हुबेहूब बनवून नकली देशी दारू दुकानातून सर्रास विक्री केल्याचे आढळून येत आहे. शहरातील अनेक दारू विकणा-या दुकानांमधून नकली लेबल लावून विदेशी विकली जात असल्याचे निर्दशनास आले आहे. अनेक ग्रामीण भागात उसाच्या फडात तसेच वांगी व मिरचीच्या मळ्यात अफू व गांजाची पिके घेतल्याचे दिसून आले आहे. या सर्व प्रकाराकडे राज्य उत्पादन शुल्क विभागाचे दुर्लक्ष वाढत आहे. तसेच आपल्या विभागातर्फे अनेक हॉटेल्स, बियर बार, देशी दारूचे, गावठी दारू उत्पादन याकडे हप्ते चालू असल्याने गावगुंडांना संरक्षण दिले जात आहे. यामुळे सामान्य माणसांचे जीवन उध्वस्त होत असून याला काही प्रमाणात राज्य उत्पादन शुल्क विभाग जबाबदार आहे, असेही निवेदनात म्हटले आहे.

शहर व जिल्ह्यात तयार करण्यात येत असलेली नकली दारू तात्काळ जप्त करावी. तसेच ज्या हॉटेल व दुकानांमधून नकली दारूची विक्री केली जात आहे, अशा दुकानांवर योग्य कारवाई करावी. अन्यथा महाराष्ट्र राज्य दारूबंदी जनआंदोलन संघटनेतर्फे तीव्र स्वरूपाचे आंदोलन करण्यात येईल असा इशारा देखील निवेदनात देण्यात आला आहे.

21 Nov 2017

एमपीसी न्यूज - राऊंड टेबल इंडिया (पीएसआरटी 177) तर्फे बालदिनानिमित्त कल्याणनगर येथे एक अनोखा फॅशन शो आयोजित केला. हा फॅशन शो नियमित होणा-या शोपेक्षा जरा हटके होता. येथे लहान-लहान मुले मॉडेल बनली होती.

बॉलिवूड चित्रपटसृष्टीप्रमाणे रेट्रो, स्पोर्ट्स, बॉलिवूड आणि बॉलीवूड माशूप अशा चार फे-या होत्या. वंचित वर्गातील मुलांनी अन्य मुलांच्या खांद्याला खांदा लावून रॅम्प वॉक  केला आणि रॅम्पवर आत्मविश्वास उमटवला.

याप्रसंगी बोलताना राऊंड टेबल इंडियाचे ललित पिट्टी म्हणाले, बालदिनाच्या निमित्ताने हा कार्यक्रम आयोजित करण्यात आला आहे. लहान मुलांच्या निरागस चेह-यांवर हसू आणावे, एवढाच उद्देश या आयोजनामागे आहे. फॅशन शोसाठी उत्साहित असलेल्या मुलांनी शिस्तबद्ध आणि सुंदर पद्धतीने सादरीकरण केले.
21 Nov 2017

जागतिक मूळव्याध दिनानिमित्त प्रकृती आयुर्वेदिक क्लिनिकतर्फे मूळव्याधीवर प्रतिबंधात्मक उपचार याविषयी परिसंवादाचे आयोजन

एमपीसी न्यूज - मूळव्याध आजाराविषयी अजूनही लोकांमध्ये जागरुकता दिसत नाही. या आजारावर योग्यवेळी उपचार करणे गरजेचे आहे. याविषयी समाजामध्ये जनजागृती होणे गरजेचे आहे. तसेच या आजाराविषयी अनेकजण मोकळेपणाने बोलत नाहीत. त्यांनी याविषयी मोकळेपणाने बोलणे आवश्यक आहे, असे मत सेंट्रल काऊन्सिल आॅफ इंडियन मेडिसीनचे मेंबर डॉ. सदानंद सरदेशमुख यांनी व्यक्त केले.

जागतिक मूळव्याध दिनानिमित्त प्रकृती आयुर्वेदिक क्लिनिकतर्फे मूळव्याधीवर प्रतिबंधात्मक उपचार या परिसंवादाचे आयोजन नवी पेठेतील पत्रकार भवन येथे करण्यात आले होते. यावेळी डॉ. शिवकुमार गोरे, डॉ. मिलिंद भोई, प्रकृती आयुर्वेदिक क्लिनिकचे डॉ. कुणाल कामठे, डॉ. शर्मिला कामठे, डॉ. नितीन बोरा, डॉ. धनराज गायकवाड, डॉ. नंदकुमार बोरसे, कर्नल संभाजी पाटील, अ‍ॅड. प्रताप परदेशी उपस्थित होते. कार्यक्रमादरम्यान पाईल्स केअर या अ‍ॅपचे उद्घाटन मान्यवरांच्या हस्ते करण्यात आले. 

डॉ. सदानंद सरदेशमुख म्हणाले, मूळव्याध या आजाराच्या उपचारांविषयी असलेल्या अनेक गोष्टी सर्वसामान्यांपर्यंत पोहोचणे गरजेचे आहे. तसेच मूळव्याध असलेल्या व्यक्तींनी डॉक्टरांनी तपासल्याशिवाय, त्यांचा सल्ला घेतल्याशिवाय कोणत्याही प्रकारची औषधे घेऊ नयेत. 

डॉ. कुणाल कामठे म्हणाले, मूळव्याध हा आजार उपद्रवी असून अजूनही त्याविषयी पुरेशी जागरुकता दिसून येत नाही. त्यामुळे या आजाराकडे एका वेगळ्या दृष्टीकोनातून पाहण्याची गरज आहे. हॉटेलमध्ये मिळणारे अन्नपदार्थ, जंक फूड टाळले पाहिजेत. दैनंदिन जीवनात आहार आणि व्यायाम यांचा समतोल राखल्यास अशाप्रकारचे आजार होणार नाहीत. मूळव्याधीविषयी अधिक जागृती व्हावी यासाठी पाईल्स केअर या अ‍ॅपची निर्मिती केली आहे. या अ‍ॅपमध्ये आपल्या आजाराची लक्षणे मांडायची आहेत. माणसांच्या प्रकृतीनुसार त्यांना या अ‍ॅपमधून योग्य सल्ला दिला जाणार आहे.

डॉ. मिलींद भोई म्हणाले, आपल्या खाण्यापिण्याच्या चुकीच्या सवयींमुळे अनेकांमध्ये मूळव्याधीचे प्रमाण वाढले आहे. या आजाराविषयी जागृती होण्यासाठी लोकशिक्षण, लोकसभा अशा गोष्टी करणे आवश्यक आहे. डॉ. नंदकुमार बोरसे म्हणाले, बसून काम करणा-या व्यक्तींमध्ये या आजाराचे प्रमाण अधिक दिसून येते.फळभाज्या, पालेभाज्यांचा अधिक वापर, डाळीचे पदार्थ कमी खाणे, ताक पिणे, भरपूर पाणी पिणे या गोष्टींचे पालन केल्यास हा आजार आटोक्यात आणण्यास मदत होते.

कर्नल संभाजी पाटील म्हणाले, प्रत्येकाने आपली प्रकृती सांभाळणे गरजेचे आहे. तसेच हा आजार होऊ नये यासाठी शारिरीकदृष्ट्या सुदृढ असणे गरजेचे आहे. शिवकुमार गोरे म्हणाले, आयुर्वेदामध्ये अनेक आजारांविषयी माहिती आणि उपचार यांचे भांडार आहे. आयुर्वेदिक औषधांचा अधिक प्रमाणात वापर केला तर मूळव्याधी सारखे आजार नक्कीच बरे होतील. 
21 Nov 2017

श्री दावडी निमगांव मल्हारी मार्तंड खंडोबा देवस्थानतर्फे दीपोत्सवाचे आयोजन 

एमपीसी न्यूज -  श्री दावडी निमगांव मल्हारी मार्तंड खंडोबा देवस्थानतर्फे चंपाषष्ठी उत्सवांतर्गत  दीपोत्सवाचे आयोजन करण्यात आले.  कसबा पेठ, शिंपी आळीतील पेशवेकालीन खंडोबा मंदिराचा परिसर शेकडो दिव्यांनी उजळून निघाला. यावेळी नागरिकांनी दीपोत्सवात मोठ्या संख्येने सहभाग घेतला.

दीपोत्सवाची सुरुवात राष्ट्रपती पुरस्कार जाहीर झालेल्या गौरी गाडगीळच्या हस्ते झाले. यावेळी उत्सवप्रमुख संदीप लचके, गायत्री लचके,रुचिरा लचके, संजय नेवासकर,भाऊ आदमणे, पीयुष शहा, शाहीर हेमंत मावळे, अजय खोडे,वसंत खुर्द उपस्थित होते.

उत्सवप्रमुख संदीप लचके म्हणाले, चंपाषष्ठी उत्सवानिमित्त विविध कार्यक्रमांचे आयोजन करण्यात आले आहे. त्यामध्ये अभिषेक व महापूजा होणार आहे. तरी भाविकांनी मोठ्या संख्येने उत्सवात सहभागी व्हावे, असे आवाहन त्यांनी केले. 

 champa 2

21 Nov 2017


एमपीसी न्यूज - जीवनातील ताण तणाव, दूर कसे करावे आणि आनंदी कसे जगावे, हे सांगणारे, अनुभवसिद्ध लेखक आणि संमोहनतज्ज्ञ महेश काटे यांनी लिहिलेले, ‘मंत्र जीवनाचा : एक नवा दृष्टीकोन’, या ई-पुस्तकाचे आमदार लक्ष्मण जगताप यांच्या हस्ते बाणेर येथे नुकतेच प्रकाशन झाले.


पुस्तक प्रकाशन सोहळ्यास उद्योजक नानासाहेब गायकवाड, नगरसेवक शत्रुघ्न काटे, नगरसेविका निर्मला कुटे, माजी नगरसेवक रामधार धारिया, उद्योजक संजय भिसे, मनीष दुगड, गोविंद वाळके, तसेच उद्योग, व्यापार, शैक्षणिक क्षेत्रातील अनेक मान्यवर यावेळी उपस्थित होते. विद्यार्थ्यांनी परीक्षेचा ताण कसा घालवावा, पालकांनी मुलांना घडवताना काय काळजी घावी, उत्तम व्यक्ती, समाज आणि उत्तम देश कसा घडवावा, याबाबत या पुस्तकामध्ये विवेचन करण्यात आले आहे.

यावेळी बोलताना आमदार लक्षमण जगताप म्हणाले, काटे हे नेहमीच वेगळा विचार करतात. संमोहन, या वेगळ्या क्षेत्रामध्ये सातत्याने काम करून, विद्यार्थी आणि समाजातील इतर घटकांसाठी उपयुक्त ठरेल, असे पुस्तक काटे यांनी उपलब्ध करून मोठे काम केले आहे.

लेखक महेश काटे म्हणाले की, ताण विरहीत आयुष्य जगणे शक्य आहे. त्यासाठी काही गोष्टी जाणीवपूर्वक कराव्या लागतील. संमोहनाचा उपयोग सहाय्यकारी आणि पूरक असा होऊ शकतो. आम्ही यासाठी गेले 14 वर्षे विविध स्तरातील अनेक व्यक्तींवर, विविध प्रयोग केले असून, त्याच अनुभवावर आधारीत, हे पुस्तक आहे. 

तात्या शिंगारे यांनी सूत्रसंचालन केले.

21 Nov 2017

एमपीसी न्यूज - देवदीपावली व खंडोबा नवरात्रारंभ निमित्त चिंचवड मधील श्री गणेश मंदिर प्रेमलोक पार्क येथे काल (सोमवार, दि. 20) सायंकाळी सात वाजता गायत्री यज्ञाचा कार्यक्रम उत्साहात संपन्न झाला. अखिल विश्व गायत्री परिवार, पतंजली योग वर्ग व संस्कृती संवर्धन संघ शाखा चिंचवड यांच्या संयुक्त विद्यमाने या कार्यक्रमाचे आयोजन करण्यात आले होते.


कार्यक्रमासाठी श्री गणेश मंदिराचे विश्वस्त कार्यक्रमासाठी उपस्थित होते. कार्यक्रम यशस्वी होण्यासाठी योग वर्गाच्या महिला भगिनी व नागरिकांनी विशेष सहकार्य घेतले, संगितमय असणारा आगळा वेगळा दिपयज्ञाच्या कार्यक्रमासाठी परिसरातील भाविकांनी मोठ्या संख्येने हजेरी लावली. दिपयज्ञाच्या माध्यमातून भारतीय संस्कृती जनमानसात रूजविणे दिव्याच्या माध्यमातून आत्मज्योती प्रज्वलीत करून आपले सतसंकल्प ईश्वरी चेतनेशी एकरूप करणे या उद्देशाने या कार्यक्रमाचे आयोजन करण्यात आले.

कार्यक्रमात अजित जगताप व चंद्रभागा गौशाळा चिखलीचे अध्यक्ष रामकृष्ण लांडगे यांनी मार्गदर्शन केले. कार्यक्रमाचे संचालन राजेंद्र देसले व प्रकाश कोहिनकर गायत्री परिवार यांनी केले.
21 Nov 2017


एमपीसी न्यूज - विद्यावाचस्पती शंकर अभ्यंकर यांना भारतीय संस्कृती आणि संगीत क्षेत्रातील विशेष योगदानाबद्दल एससीएसव्हीएमव्ही म्हणजेच श्री चंद्रशेखरेन्द्र सरस्वती महा विश्वविद्यालयाद्वारे डी. लिट्. चा सन्मान प्रदान करण्यात आला. विद्यापीठाच्या 21 व्या दीक्षांत समारोह सोहळ्यामध्ये प.पू. शंकराचार्य जयेन्द्र सरस्वती यांच्या हस्ते आणि  प.पू. शंकराचार्य विजयेन्द्र सरस्वती यांच्या उपस्थितीत त्यांना सन्मानित करण्यात आले.


कांचीपुरम येथील नामांकित एससीएसव्हीएमव्ही म्हणजेच श्री चंद्रशेखरेंद्रा सरस्वती  महा विश्वविद्यालय येथे शनिवार 18 नोव्हेंबर 2017 रोजीे 21 व्या दीक्षांत समारोह सोहळा पार पडला. यावेळी आदित्य प्रतिष्ठानचे अध्यक्ष, विद्यावाचस्पती शंकर अभ्यंकर यांना डी.लिट. ने  सन्मानित करण्यात आले. यावेळी विद्यापीठाचे कुलपती- डॉ. जयराम रेड्डी, उपकुलपती डॉ विष्णू पोट्टी, रजिस्ट्रार - जी. श्रीनिवासु आणि निवृत्त न्यायमूर्ती आर. के. अग्रवाल मुख्य अतिथी म्हणून उपस्थित होते.

डॉ अभ्यंकर म्हणाले की, मी हा पुरस्कार नम्रतेने आणि कृतज्ञतेने स्वीकारतो आणि या विद्यापीठाच्या ज्ञानपरंपरेत यथाशक्ती भर घालण्याचे आश्वासनही देतो. सहस्त्रावधी वर्षे भारतात संपूर्ण जगाला एक कुटुंब, एक घर मानले आहे. या संपूर्ण जगातील देवघर म्हणजे आपला भारत आहे. या देवघराचे पवित्र्य राखण्यासाठी प.पू. शंकराचार्य चंद्रशेखर सरस्वती यांच्यासारखे दैवी महापुरुष आपल्याला मार्गदर्शन करण्यासाठी भूतलावर येतात.

सर्व यशस्वी पदवीधरांचे अभिनंदन करून डॉ. अभ्यंकर म्हणाले, तर्कशास्त्र, माहिती, कार्यकारण भाव यासाठी बौद्धिक, हृदयाच्या विकसनासाठी भावनिक आणि आपल्या व्यक्तिमत्वाच्या उन्नतीसाठी सर्जनशील अशा व्यक्तिमत्वाच्या त्रिविध पैलूंचा संगम करून आपण सर्वजण जबाबदार नागरिक व्हावे. तुमची बुद्धी, तुमचे कौशल्य, तुमचे ज्ञान हे सर्व आपल्या राष्ट्राच्या उन्नतीसाठी आणि प्रगतीसाठी तसेच सगळा समाज एकात्म, एकरस होण्यासाठी उपयोगी आले पाहिजे. प्रत्येक विद्यार्थ्याने प्राथमिक शाळेत शारीरिक, माध्यमिक शाळेत मानसिक, महाविद्यालयात वैचारिक आणि विद्यापीठात आध्यात्मिक मूल्ये धारण करून आत्मोन्नत झाले पाहिजे, असे सांगत माणूस जोडला की राष्ट्रही जोडले जाते, हा सिद्धांतही अभ्यंकरांनी आग्रहाने मांडला.

यापूर्वी पुण्यातील टिळक महाराष्ट्र विद्यापीठातर्फे 2012 मध्ये विद्यावाचस्पती अभ्यंकरांना डी. लिट पदवीने सन्मानित करण्यात आले होते.

21 Nov 2017


एमपीसी न्यूज - देशात ओबीसीं व बलुतेदारांची लोकसंख्या मोठी आहे. त्यांनी संघटित लढा उभारावा व त्यातून त्यांनी त्यांच्या हिताच्या मागण्या पूर्ण करण्यासाठी प्रयत्न करावेत. सध्याचे मोदी यांचे लोकाभिमुख सरकार त्यादुष्टीने न्यायाची भूमिका घेत आहे व पुढील काळातही घेत राहील असे प्रतिपादन खासदार अमर साबळे यांनी बलुतेदारांच्या शिष्टमंडळासमोर केले.


बारा बलुतेदार समाज विकास संघाच्या वतीने विविध मागण्यांचे निवेदन खासदार अमर साबळे यांना बारा बलुतेदार संघाचे अध्यक्ष रामदास सूर्यवंशी व निरीक्षक प्रदीप वाळुंजकर यांच्या हस्ते देण्यात आले त्यावेळी ते बोलत होते. यावेळी सचिव राजेंद्र पंडित, संपर्कप्रमुख विशाल वाळुंजकर, उत्सव प्रमुख रोहीत यवतकर, पी.सी.एम.सी. अध्यक्ष नागेश भोपुलकर, महिलाध्यक्ष सरला कानमपल्लीवार, अशोक पंडित, अमीर शेख, देवेंद्र शिरसाठ, गणेश वाळुंजकर, संतोष शिंदे, चेतन भालेराव, संदीप राऊत, अनंत कानडे, नितीन कुट, प्रशांत गायकवाड, विशाल गुडेकर-कुंभार आदी उपस्थित होते.

खासदार अमर साबळे यांना देण्यात आलेल्या निवेदनात; बारा बलुतेदारांना स्वतंत्र बजेट देणे, ओबीसी जनगणनना जाहीर करणे, बलुतेदारांना क्रिमिलिअर मधून वगळणे, बारा बलुतेदारांसाठी व्यवसायिक शैक्षणिक प्रगतीचे धोरण ठरविणे, बारा बलुतेदारांना स्वतंत्र राजकीय व शासकीय प्रतिनिधीत्व तसेच जननायक कर्पूरी ठाकूर यांना भारतरत्न द्यावा, राष्ट्रसंत सेना व नामदेव महाराज यांच्यासह स्वातंत्र्यसूर्य हु.भाई कोतवाल यांचे टपाल तिकिट काढावे आदी मागण्या करण्यात आल्या.

निवेदनात करण्यात आलेल्या मागण्यांचा योग्य पाठपुरावा करू, असे आश्वासन खासदार साबळे यांनी शिष्टमंडळाला दिले. सूत्रसंचालन विशाल वाळुंजकर यांनी केले. आभार नागेश भोपूलकर यांनी मानले. निवेदनाचे वाचन सचिव राजेंद्र पंडित यांनी केले.

21 Nov 2017


रविवारी रोटरी क्लब युथ एक्सचेंज उपक्रम मेळाव्याचे आयोजन

एमपीसी न्यूज - रोटरी डिस्ट्रीक्ट 3131 च्या वतीने 'रोटरी युथ एक्सचेंज' या कार्यक्रमांतर्गत 15 ते 18 वर्षे वयोगटातील विद्यार्थ्यांना एक वर्षे शिक्षणासाठी परदेशात राहण्याची संधी मिळणार आहे. या उपक्रमाची माहिती देण्यासाठी निगडी प्राधिकरण येथील रोटरी कम्युनिटी सेंटर येथे रविवार (दि. 26) रोजी पालक व विद्यार्थी मेळावा आयोजित करण्यात आला आहे. रोटरी क्लब ऑफ सिंहगड रोडचे अध्यक्ष अशोक भंडारी आणि सदस्य सतीश खाडे यांनी ही माहिती दिली.

जगातील विविध देशांमध्ये जून ते जुलै या कालावधीत रोटरीतर्फे विद्यार्थ्यांना पाठवण्यात येते. विद्यार्थ्यांच्या राहण्याची, खाण्याची व शिक्षणाची सोय रोटरीकडून करण्यात येते. या उपक्रमामुळे विद्यार्थ्यांचा आत्मविश्वास, परकीय भाषा ज्ञान, जगातील अनेक मित्र, वैचारिक आवाक्याद्वारे व्यक्तिमत्व विकास होतो. जागतिक मैत्री व शांततेसाठी देखील हा उपक्रम पूरक ठरत आहे. सदर उपक्रम दरवर्षी रोटरी डिस्ट्रीक्ट 3131 तर्फे राबविला जातो, असेही खाडे म्हणाले.

या उपक्रमाबाबत अधिक माहिती देण्यासाठी रोटरीच्या वतीने परदेशी मुलांबरोबर या पालक व विद्यार्थी मेळाव्याचे आयोजन करण्यात आले आहे. या मेळाव्यासाठी सर्वांना प्रवेश विनामूल्य आहे.

21 Nov 2017

देहुरोड येथील बोयतने जमविली चित्रपटसृष्टीतील कलाकारांची 350 टपाल तिकीटे; इंडिया बुक ऑफ रेकॉर्डतर्फे मिळाला सन्मान

एमपीसी न्यूज - भारतीय चित्रपट सृष्टीला नुकतीच 100 वर्ष पूर्ण झाली. यार्श्वभूमीवर देहुरोड येथील चित्रपटप्रेमी संदीप बोयत यांनी हिंदी, मराठीतील जुन्या कलाकारांच्या 350 टपाल तिकीटांचा संग्रह केला आहे. या आगळ्यावेगळ्या संग्रहाबद्दल इंडिया बुक ऑफ रेकॉर्डकडून त्यांचा सुवर्णपदक देऊन गौरव करण्यात आला.

इंडिया बुक ऑफ रेकॉर्डकडून देशभरातील अशा प्रकारचे विविध छंद जोपासत विविध गोष्टींचा संग्रह करणा-या 100 अवलियांचा सन्मान करण्यात आला. त्यामध्ये संदीप बोयत यांचीही निवड झाली. दिल्ली येथे नुकत्याच झालेल्या एका कार्यक्रमात इंडिया बुक ऑफ रेकॉर्डचे मुख्य संपादक डॉ. बिश्वरूप रॉय चौधरी यांच्या हस्ते सुवर्णपदक देऊन गौरव करण्यात आला.

बोयत यांच्या संग्रहात 1990 च्या दशकापासून सर्व तिकीटांचा समावेश आहे. चित्रपटसृष्टीच्या शंभरीनिमित्त टपाल खात्याने प्रसिध्द केलेली तिकीटेही त्यांनी जमविली आहेत. त्यांनी जमा केलेल्या तिकीटांमध्ये चित्रपट सृष्टीचे जनक दादासाहेब फाळके, किशोर कुमार, मधुबाला, बलराज साहनी, चेतन आनंद, राजेश खन्ना, संजीव कुमार, देव आनंद, अशोक कुमार, शम्मी कपूर, बी.आर.चोपडा, राजेंद्र कुमार, मेहमूद संगीतकार आर.डी.बर्मन, ओ.पी. नय्यर, मदन मोहन, नौशाद शंकर जयकिसन, गीता दत्त, यश चोप्रा आणि मराठीमधील दूर्गा खोटे, भालजी पेंढारकर, स्मिता पाटील अशा गाजलेल्या कलाकारांचा समावेश आहे.

संदीप यांचे वडील रमेश बोयत हे चित्रपसृष्टीमध्ये कॅमेरामन आणि ज्युनिअर कलाकार म्हणून काम करत. त्यांनी 50 ते 60 हिंदी चित्रपटामध्ये काम केले आहे. त्यातून संदिपला या विषयी आवड निर्माण झाली. संदिप यांनी वडिलांच्या पाऊलावर पाऊल टाकत कॅमेरामनचे काम करायला सुरवात केली. त्यातून वेगळा छंद जोपासत संदिप यांनी गेल्या चार वर्षापासून कलाकारांची टपाल तिकिटे गोळा करायला सुरवात केली.

संदीप बोयत यांनी दहा ते वीस शॉट फिल्म, लघू फिल्म तयार केल्या असून 20 ते 25 हिंदी, मराठी सिनेमांमध्ये ज्युनिअर कलाकार म्हणून काम केले असल्याचेही त्यांनी 'एमपीसी न्यूज'शी बोलताना सांगितले. संदिप यांचे आजोबा हे स्वातंत्र्य सेनानी होते. आझाद हिंद सेनेबरोबर त्यांनी काम केल्याबद्दल त्यांना गौरविण्यात आल्याचेही त्यांनी सांगितले.

page


21 Nov 2017


एमपीसी न्यूज - मुलांमध्ये मोबाईल आणि संगणकावरील गेम यांचं प्रमाण वाढत आहे. चार भिंतींच्या आतील बैठे खेळ मोठ्या प्रमाणात खेळले जात आहेत. त्यामुळे मुलांमध्ये विविध आजारांचे संक्रमण होत आहे. तसेच त्यांच्यामध्ये आळसाचे प्रमाण वाढले आहे. त्यांना चार भिंतींच्या बाहेर काढण्याच्या उद्देशाने पिंपळे गुरव येथील रोजलॅंड सोसायटीने अनोखा उपक्रम राबविला. मुलांसाठी मल्टिस्पोर्ट ग्राउंड तयार करण्यात आले आहे.


मुलांनी स्वतः अशा प्रकारच्या मैदानाची मागणी केली. त्यावर सोसायटीच्या सर्व सदस्य व पदाधिका-यांनी विचार करून मल्टिस्पोर्ट ग्राउंड तयार करण्याचा निर्णय घेतला. या मैदानाचे उदघाटन नुकतेच करण्यात आले. मैदानाच्या उदघाटन प्रसंगी नगरसेवक नाना काटे, शत्रुघ्न काटे, निर्मला काटे, सोसायटीमधील सर्व सदस्य व नागरिक उपस्थित होते. शहरातील सर्व वसाहतींमध्ये अशा प्रकारची मैदाने तयार करून मुलांना मैदानी खेळासाठी सज्ज करायला हवे. त्यातून त्यांचा शारीरिक व मानसिक विकास साधण्यास मदत होणार आहे.

मुलांनी मैदानी खेळ खेळायला हवे, असे विविध स्तरांमधून केवळ बोलले जाते. पण त्यावर कृती मात्र शून्य होते. काही वसाहतींमध्ये भरपूर मोकळी जागा उपलब्ध असते. तर बहुतांश वसाहतींमध्ये जागेची कमतरता मोठ्या प्रमाणात भासते. रोजलॅंड सोसायटीमध्ये देखील जागेची कमतरता आहे. मात्र जागेच्या कमतरतेला कवटाळून न बसता या सोसायटीने केवळ चार गुंठे एवढ्या जागेवर विविध खेळ खेळता येतील असे मैदान तयार केले आहे. या मैदानावर कबड्डी, हॉलीबॉल, खो-खो असे खेळ खेळता येत आहेत. याच मैदानावर कुस्तीसाठी देखील व्यवस्था करून देण्यात येणार आहे. अशी माहिती रोजलॅंड सोसायटीचे संतोष म्हसकर यांनी दिली.

21 Nov 2017


एमपीसी न्यूज - छत्रपती शिवाजी महाराज आणि सबंध महाराष्ट्राचा तसेच गड किल्ल्यांचा इतिहास मुलांना जवळून समजावा, यासाठी पिंपरी-चिंचवड येथील दोन वृत्तपत्र विक्रेत्यांनी एक अभिनव उपक्रम सुरु केला आहे. यामध्ये प्रत्येक महिन्याच्या दुस-या किंवा तिस-या रविवारी विद्यार्थ्यांना एखाद्या गड-किल्ल्यावर घेऊन जायचे, तिथे त्यांना इतिहास दर्शन करून द्यायचे, असा हा उपक्रम वृत्तपत्र विक्रेते गडकिल्ले संवर्धन समितीचे सदस्य रघुराज एरंडे आणि मनोज काकडे यांनी वृत्तपत्र विक्रेत्यांच्या मुलांसाठी सुरु केला आहे.


विद्यार्थ्यांना इतिहास समजावा, त्यानिमित्ताने गडकिल्ल्यांना भेटी द्याव्या आणि त्यांचे संवर्धन व स्वच्छता यासाठी हा उपक्रम सुरु करण्यात आला असून रघुराज एरंडे, मनोज काकडे व त्यांच्या टीमने मागील रविवारी लोणावळ्या नजिक असलेल्या कोरी गडाला भेट दिली. या आगळ्या वेगळ्या संकल्पनेला सर्व वृत्तपत्र विक्रेत्यांना पाठिंबा दिला आहे. ही संकल्पना भविष्यात आणखी विस्तृत करण्याचा मानस मनोज काकडे यांनी व्यक्त केला आहे.

वृत्तपत्र विक्रेते किंवा सामान्य नागरिकांच्या मुलांना बाहेर जाता येत नाही. त्यामुळे केवळ पुस्तकी ज्ञानावरच त्यांना समाधान मानावे लागते. पुस्तकात शिकणा-या गोष्टी जर जवळून पाहता आल्या, त्यांचा अनुभव घेता आला तर त्या शिक्षणात आणखी रस निर्माण होतो. मात्र, सर्वसामान्य नागरिकांच्या खिशाला ही बाब परवडत नाही. त्यामुळे ही मुले घरीच टीव्ही किंवा मोबाईलवर चिकटून बसतात. रविवारची सुट्टी देखील अशीच छोट्या-मोठ्या कामात निघून जाते. त्यांची सुट्टी चांगल्या कामासाठी खर्च व्हावी, असाही यामागचा उद्देश आहे.

कोरी गडानंतर पुढील स्वारी रायगडाची आहे. सध्या या टीममध्ये 20 विद्यार्थी असून विद्यार्थी संख्या दिवसेंदिवस वाढत आहे. वाढत्या विद्यार्थी संख्येबरोबर जबाबदारी देखील वाढत असल्याने योग्य नियोजन आणि व्यवस्थापन झाल्यानंतर पुढील गडाला भेट देण्यात येणार आहे, असेही काकडे म्हणाले.

gad 1

gad 3

20 Nov 2017


एमपीसी न्यूज - अन्न व औषध प्रशासनाने अन्न विक्रेत्यांसाठी घेतलेल्या स्वच्छता कार्यशाळेस फेरीवाले-टपरीधारक अशा अन्न विक्रेत्यांचा उत्स्फूर्तपणे प्रतिसाद मिळाला. यावेळी अन्न व औषध प्रशासनाकडे नोंद केलेल्या 85 विक्रेत्यांना परवाने देण्यात आले.

पिंपरीतील कै. लोखंडे सभागृहात झालेल्या कार्यक्रमात अन्न व औषध प्रशासनाचे सहाय्यक आयुक्त संपत देशमुख, सहाय्यक आयुक्त संजय नारागुडे, अन्न सुरक्षा अधिकारी एस. पी. धुळे, अन्न सुरक्षा अधिकारी के.बी. जाधव, आर.जे. जेगटे, एल. एस. साळवे, आर.जी. नागवेकर, दिलीप करंजखेले, दयानंद विर, संतोष सावंत आदी उपस्थित होते.

यावेळी बोलताना सहाय्यक आयुक्त संजय नारागुडे म्हणाले की, स्वच्छतेला अधिक प्राधान्य द्या. भविष्यात अन्न विक्रेता परवाने धारकास अन्न प्रशिक्षण घेणे बंधनकारक असणार आहे. ग्राहक हा तुमच्यावर विश्वास ठेवून तुमच्याकडे खाण्यासाठी येत असतो. त्यांना स्वच्छ व आरोग्यदायी खाद्यपदार्थ देणे ही विक्रेत्याची नैतिक जबाबदारी आहे. या बाबतीत जो कायद्याचे उल्लंघन करेल त्या विक्रेत्यांवर कडक कारवाई केली जाईल.

यावेळी सुमारे अडीचशे खाद्यपदार्थ विक्रेते सहभागी झाले होते. सहभागी प्रशिक्षणार्थींना सहभागाबद्दल प्रमाणपत्रे देण्यात आले. यावेळी अन्न सुरक्षा अधिकारी धुळे यांनी दृकश्राव्याच्या माध्यमातून स्वच्छतेबाबत माहिती दिली. कार्यक्रमाचे सूत्रसंचालन लक्ष्मीकांत सावळे यांनी केले. आभार दिलीप करंजखेले यांनी मानले.

20 Nov 2017

एमपीसी न्यूज - विद्यार्थ्यांच्या सर्वांगीण विकासासाठी शाळेतील विद्यार्थ्यांनी सूर्यनमस्काराबाबत प्रक्षिशण शिबिरात विद्यार्थ्यांचा उत्स्फूर्त सहभाग लाभला. त्यातूनच सूर्यनमस्काराची जनजागृती करण्यात आली.


प्रभाग क्रमांक 23 थेरगाव येथील विविध शाळांतून सूर्यनमस्काराची जनजागृती करण्यात आली. यावेळी रोझ लॅण्ड सोसायटीचे अध्यक्ष संतोष म्हसकर, नगरसेवक व स्थायी समितीचे सदस्य कैलास बारणे, योग प्रशिक्षक पालनकर गुरुजी, मुख्य योग प्रशिक्षक माया चत्तुर आदी उपस्थित होते.

अपक्ष नगरसेवक कैलास बारणे म्हणाले की, पिंपरी-चिंचवड महापालिकेच्या शाळेतील विद्यार्थ्यांचे आरोग्य चांगले रहावे. त्यांची बुद्धीक्षमता वाढावी यासाठी विद्यार्थ्यांनी सूर्यनमस्कार करावा. सूर्यनमस्कार घातल्याने आरोग्य तंदुरुस्त राहते. आकलन क्षमता वाढते.

WhatsApp Image 2017 11 19 at 2.39.07 PM
20 Nov 2017


एमपीसी न्यूज - ऑटो रिक्षा चालक मालक संघटना, संयुक्त कृती समितीचे महाराष्ट्र सरचिटणीस आणि महाराष्ट्र रिक्षा पंचायत अध्यक्ष बाबा कांबळे यांच्या नेतृत्वाखाली रिक्षा चालकांच्या विविध मागण्यांसंदर्भात आज (सोमवारी) आरटीओ कार्यालय पुणे येथे आंदोलन करण्यात आले.


विश्रांतवाडी येथे पूर्वीच्या ठिकाणीच रिक्षा पासिंगची व्यवस्था व्हावी, छोट्या गाड्यांसाठी 100 मीटर अंतरात पासिंगला सरकारने मान्यता दयावी. पुण्यातील रिक्षाचालकांना सासवड येथील पासिंग ट्रॅक वर पाठवू नये, नवीन रिक्षा विक्रीमध्ये रिक्षा विक्रेते (डीलर) जास्त पैसे घेऊन रिक्षा विकत आहेत, अशा रिक्षा विक्रेते आणि कंपनीवर कारवाई करावी, रिक्षाची जीएसटी कमी करावी, बेकदेशीर जाहिरात करणा-या ओला कंपनी विरोधात गुन्हा दाखल करावा. यांसारख्या विविध मागण्या यावेळी करण्यात आल्या.

या आंदोलनात शिवनेरी रिक्षा संघटना, आम आदमी रिक्षा संघटना, महाराष्ट्र रिक्षा पंचायत, पुणे रिक्षा फेडरेशन, प्रियदर्शनी रिक्षा संघटना आदी संघटना या आंदोलनात सहभागी झाल्या. यावेळी आनंद अंकुश, प्रतीक साळेकर, आनंद तांबे, नितीन शिंदे, दत्ता पाटील, विजय रवळे, प्रदीप भालेराव, गणेश वैरट, साई मोटाडू, सुनील देवकुळे, रमेश पाटील, चिमाजी मोरे, समीर शेख, संजय अधिकारी, संदीप थोपटे, अनिल कांबळे, राजूगोपी लांडगे, सादिक पटेल, तोफख खाण, हनिफ शेख आदी उपस्थित होते.

यावेळी बोलताना बाबा कांबळे म्हणाले की, पुणे शहरातील रिक्षा चालकांना सासवड येथे पासिंगसाठी जावे लागणार आहे. हा प्रकार रिक्षा चालकांना त्रासदायक आहे. आपल्या शहरात रिक्षा पासिंगसाठी अद्ययावत ट्रॅक नाही, याबाबत पाठपुरावा न केल्यामुळे रिक्षा चालकांना त्रास होत आहे. पिंपरी-चिंचवड येथे महाराष्ट्र रिक्षा पंचायतने पाठपुरावा केल्यामुळे अद्यावत पासिंग ट्रॅक उपलब्ध आहे. पिंपरी-चिंचवड येथील सहा हजार रिक्षाचालकांसाठी पासिंग ट्रॅक उपलब्ध होऊ शकतो, तर मग पुण्यातील पन्नास हजार रिक्षा चालकांसाठी ही सुविधा उपलब्ध का होत नाही? प्रशासनाने विश्रांतवाडी येथे अद्ययावत पासिंग ट्रॅक उपलब्ध करावा, रिक्षा विक्रीमध्ये काळा बाजार करणा-यांवर कारवाई करावी, अन्यथा पुढील काळात तीव्र आंदोलन केले जाईल.

बाबा कांबळे यांच्या नेतृत्वाखाली शिष्टमंडळाने पुणे प्रादेशिक परिवहन अधिकारी बाबासाहेब आजारी यांची भेट घेऊन निवेदन दिले. यावेळी बाबासाहेब आजारी यांनी छोटया वाहनांसाठी 100 मीटर पासिंग ट्रॅकला मान्यता मिळवण्यासाठी आम्ही प्रयत्न करू, 100 मीटर ट्रॅकला मान्यता मिळाल्यास विश्रांतवाडी येथे तीन ट्रॅक निर्माण होऊ शकतात असे आश्वासन शिष्टमंडळास दिले.

आरटीओ कार्यालयासमोर रिक्षा चालकांनी त्यांच्यावर होत असलेल्या अन्यायाविरोधात घोषणाबाजी केली. रिक्षा पासिंग ट्रॅक उपलब्ध झालाच पाहिजे, रिक्षा विक्रीमधील काळा बाजार थांबलाच पाहिजे परमिट घोटाळा करणा-यांवर कारवाई केलीच पाहिजे. अशा घोषणा यावेळी देण्यात आल्या.

20 Nov 2017


सार्थक वेल्फेअर फाऊंडेशनतर्फे आर्ट ऑफ स्मार्ट पॅरेंटिंग या विषयावरील व्याख्यानाचे आयोजन

एमपीसी न्यूज - पालकांना आपल्या मुलांनी प्रत्येक क्षेत्रात बाजी मारली पाहिजे, असे वाटत असते. परंतु प्रत्येक मूल हे वेगळे असते. तसेच मुलांमध्ये वेगवेगळी कौशल्य दडलेली असतात. त्यांच्यामध्ये असलेली ही कौशल्ये पालकांनी ओळखली पाहिजे आणि कौशल्ये विकसित करण्यासाठी साध्या, सोप्या पद्धतींचा अवलंब केला पाहिजे, असे मत बालरोगतज्ज्ञ डॉ. सुनील गोडबोले यांनी व्यक्त केले.

सार्थक वेलफेअर फाऊंडेशनतर्फे आर्ट ऑफ स्मार्ट पॅरेंटिंग याविषयी व्याख्यानाचे आयोजन नवी पेठेतील पत्रकार भवन येथे करण्यात आले होते. यावेळी डॉ. सुनील गोडबोले आणि डॉ. अश्विनी गोडबोले यांनी उपस्थित पालकांना मार्गदर्शन केले.

डॉ. सुनील गोडबोले म्हणाले की, प्रत्येक गोष्टींमध्ये आपल्या मुलांची दुस-याशी तुलना करणे पालकांनी सोडले पाहिजे. लहान मुलांना समजून घेण्यासाठी पालकांनी आपला थोडावेळ त्यांच्यासाठी देणे गरजेचे आहे. पालकांनी देखील मुलांबरोबर विविध खेळ खेळले पाहिजे. यामधून त्यांच्यामध्ये असलेली एखाद्या क्रीडाप्रकाराची आवड पालकांच्या लक्षात येईल. तसेच त्यांना घरगुती गोष्टींमधून देखील विविध प्रकारचे शिक्षण मिळू शकते. 

ते पुढे म्हणाले की, एखादी गोष्ट चित्र, तक्ते, चिन्ह अशा माध्यमांमधून लहान मुलांना पटकन कळते आणि ती लक्षात राहते. त्यामुळे लेखन, वाचन, गणिते या विषयांचा अभ्यास मुलांकडून करून घेताना पालकांनी त्यांना हे विषय वेगवेगळ्या गोष्टींचा वापर करून शिकविल्या पाहिजेत. अशाप्रकारे त्यांच्याकडून अभ्यास करून घेतल्यास त्यांची स्मरणशक्ती वाढेल आणि त्यांना अभ्यासाची आवड देखील निर्माण होईल, असे त्यांनी सांगितले. प्रत्येक वयोगटातील मुलांसाठी आणि पालकांसाठी सार्थक फाऊंडेशन वर्षभर विविध उपक्रमांचे आयोजन करणार आहे, असे संस्थेच्या संचालिका स्वाती नामजोशी यांनी सांगितले.

WhatsApp Image 2017 11 19 at 2.39.07 PM

20 Nov 2017


एमपीसी न्यूज - एचआर कनेक्ट असोसिएशनच्या वतीने एचआर क्षेत्रातील अधिकारी व कर्मचा-यांसाठी सुधारित मायक्रोसॉफ्ट एक्सेल बाबत प्रशिक्षण सत्राचे आयोजन यमुनानगर निगडी येथील प्रोग्रेसिव्ह एज्यूकेशन सोसायटीच्या आयएमसीडी कॉलेजमध्ये करण्यात आले. एकूण 85 एचआर क्षेत्रातील अधिकारी व कर्मचा-यांनी या प्रशिक्षण सत्राचा लाभ घेतला.


यावेळी आयएमसीडी कॉलेजच्या संचालिका सूर्या दास, एचआर कनेक्ट असोसिएशनचे अध्यक्ष संतोष चव्हाण, उपाध्यक्ष अनिल भोईटे, सचिव वनराज भोसले, सहसचिव सतीश पवार आणि कॉर्पोरेट ट्रेनर संदीप पोवार व्यासपीठावर उपस्थित होते.

या सत्राचे सादरीकरण कॉर्पोरेट ट्रेनर संदीप पोवार यांनी केले. या सादरीकरणासाठी पोवार यांना, एच आर मॅनेजर अक्षता शिंदे-मोहिते यांनी साथ केली. एक्सेल कसे वापरू नये, संदर्भ घेत असतानाचे मुख्य डाटा शिटचे महत्व, माहिती भरत असताना चुकूनही चूक होणार नाही. याबाबत घ्यावयाची काळजी, मुख्य डाटाचा वापर करून विविध पिव्होट टेबल तयार करणे, व्ही लूकअप कसे करावे व विविध रिपोर्टचे निर्माण करणे, विविध फॉर्मूल्यांचा वापर करून कठीण आकडेमोड सोपी करणे तसेच एक्सेलची विविध किमया यांसारख्या विषयांवर पोवार यांनी उपस्थितांना मार्गदर्शन तसेच उपस्थितांच्या शंकांचे निरसरन केले.

यावेळी बोलताना एचआर कनेक्ट असोसिएशनचे अध्यक्ष संतोष चव्हाण म्हणाले की, एचआर कनेक्ट असोसिएशनच्या माध्यमातून विविध शैक्षणिक, सामाजिक, कायदे विषयक व विकसनशीलतेसाठी आवश्यक असणारे उपक्रम यापुढे देखील राबविण्याचा मानस आहे.

कार्यक्रमाच्या आयोजनासाठी एचआर कनेकट असोसिएशनचे अध्यक्ष संतोष चव्हाण, उपाध्यक्ष अनिल भोईटे, सचिव वनराज भोसले, सहसचिव सतिश पवार, खजिनदार अक्षय दिघे, सहखजिनदार अर्जुन माने, कार्यकारिणी सदस्य चेतन मुसळे, शिवाजी चौंधकर, मधुकर सूर्यवंशी, आत्माराम बोचरे, सदस्य धीरज अधिकारी, संजय वाघमारे, रवींद्र शिंदे, सोपान फरांदे संतोष बर्गे, विजय पाटील, निशिकांत काटकर, महेश गुमे, अर्चना देशमुख, सोनाली देसाई, आनंद जोशी तसेच आयएमसीडी कॉलेजच्या शिक्षकांनी परिश्रम घेतले.


कार्यक्रमाचे सूत्रसंचालन व आभार सूदर्शन पवार यांनी केले.

Page 1 of 103