21 Jul 2018

एमपीसी न्यूज- ज्ञानोबा माऊली...तुकाराम या जयघोषात आज लोणावळ्यातील व्हि.पी.एस शाळेतील विद्यार्थ्यांनी आषाढी एकादशीचे निमित्त साधत पालखी सोहळ्याचे आयोजन करण्यात आले होते 

वारकर्‍यांचा पेहराव करत विद्यार्थी सोहळ्यात सहभागी झाले होते. गळ्यात तुळशी माळ, कपाळी बुक्का, गळ्यात टाळ, मृदुंग तर मुलीच्या डोक्यावर तुळशी वृंदावन व मुखातून ज्ञानबा तुकारामांच्या नावाचा जयघोष यामुळे शाळेचा सर्व परिसर भक्तिमय झाला होता.

प्रशालेचे प्राचार्य सुधिरेंद्र देशपांडे यांच्या हस्ते ज्ञानोबा माऊली व तुकाराम महाराजांच्या प्रतिमेचे पूजन करत पालखी सोहळ्याला सुरुवात झाली. एकादशीचे औचित्य साधत शाळेत विद्यार्थ्यांच्या अभंग गायन स्पर्धा, वारकरी छायाचित्र प्रदर्शन, वृक्षारोपण या कार्यक्रमांचे आयोजन करण्यात आले होते. यावेळी शाळेच्या उपप्राचार्या नेव्हल व शिक्षक वर्ग उपस्थित होते.

21 Jul 2018

एमपीसी न्यूज- लोणावळा नगरपरिषदेचा दवाखाना शासनाच्या आरोग्य विभागाकडे हस्तांतरीत करण्यात आला असला तरी तो सुरु होण्यास काही कालावधी लागणार असल्याने तोपर्यत तातडीने शहरात ओपीडी व आॅपरेशन थिएटर सुरु करण्याचे आदेश आरोग्य विभागाला देण्यात यावेत अशी मागणी लोणावळा नगरपरिषदेने मुख्यमंत्री देवेंद्र फडणवीस यांच्याकडे केली आहे.

लोणावळा नगरपरिषदेचे डाॅ. बाबासाहेब डहाणुकर रुग्णालय मागील अनेक वर्षापासून वैद्यकीय अधिकार्‍यांविना बंद अवस्थेत होते. सदरचे रुग्णालय नागरिकांच्या सेवेकरिता शासनाकडे वर्ग करण्यात आले असून त्याठिकाणी शंभर खाटाचे शासकिय उपजिल्हा रुग्णालयाला मंजुरी मिळाली आहे. या उपजिल्हा रुग्णालयाकरिता आवश्यक असलेली जागा व कर्मचारी नगरपरिषदेने हस्तांतरित केले आहेत. मात्र शासनाच्या आरोग्य विभागाकडून याकडे दुलर्क्ष झाल्याने मागील काही काळापासून या उपजिल्हा रुग्णालयाच्या कामात प्रगती झालेली नाही.

सध्याचा वैद्यकीय खर्च सर्वसामान्य नागरिकांना परवडणारा नसल्याने सदरचे शासकिय रुग्णालय तातडीने सुरु करण्यात यावे अशी मागणी सर्व स्तरातून जोर धरु लागली आहे. लोणावळा शहरातून पुणे-मुंबई द्रुतगती मार्ग व राष्ट्रीय महामार्ग जात असल्याने याभागात अपघाताच्या अनेक घटना घडत असतात, या सर्व घटनांचा गांभीर्याने विचार करून रुग्णालय सुरु होई पर्यत तातडीने ओपीडी सेवा सुरु करण्याचे आदेश आरोग्य विभागाला देण्यात यावेत अशी मागणी नगराध्यक्षा सुरेखा जाधव यांनी मुख्यमंत्र्यांकडे केली आहे.

20 Jul 2018

एमपीसी न्यूज - लोणावळा शहराच्या तुंगार्ली धरणाजवळ असलेले पांगळोली हे धनगर व कातकरी वस्ती असलेल्या आदिवासी गावात मागील चार दिवसापासून बत्ती गुल झाल्याने हे गाव अंधारात अाहे. तसेच विज नसल्याने गावात चार दिवसापासून पाणी देखिल न आल्याने नागरिकांची मोठी गैरसोय झाली असताना विज वितरण कंपनीचे मात्र याकडे दुलर्क्ष झाले असल्याचे या गावचे माजी सरपंच बबन खरात यांनी सांगितले.

खरात म्हणाले मागील चार दिवसांपासून गावात लाईट नसल्याने शाळकरी विद्यार्थी व महिला वर्गाचे मोठे हाल झाले आहेत. मोबाईल चार्ज होऊ शकत नाही. विज वितरण क‍ार्यालयात तक्रार दिल्यानंतरही अद्याप दखल घेतली न गेल्याने या संपुर्ण गावाला अंधारात राहण्याची वेळ आली आहे. विज वितरणच्या अधिकार्‍यांनी याची दखल घेत तातडीने विजेची समस्या सोडवावी.

लोणावळ्यात विजेचा लपंडाव सुरुच

मागील चार पाच दिवसात लोणावळा परिसरात झालेल्या जोरदार पावसाने शहरात अनेक भागात विजेचा लपंडाव सुरु आहे. वारंवार विज पुरवठा खंडित होत असल्याने नागरिक त्रस्त झाले आहेत. याबाबत विज वितरणचे अभियंता चव्हाण यांच्याशी संपर्क साधला असता  वारा व पावसामुळे अनेक ठिकाणी तारा तुटने, जंम्प खराब होणे, झाडे पडणे असे प्रकार घडले आहेत. पावसाचे पाणी साचलेल्या भागात समस्या उदभवल्याने काम करण्यात अडचणी येत असल्या तरी आमचे पथक दिवसरात्र काम करत विज पुरवठा पुर्ववत करण्याचे काम करत आहे.

17 Jul 2018

एमपीसी न्यूज - लोणावळा धरण‍च्या लगत असलेली बगीचा आरक्षणाची जागा घेणे म्हणजे नागरिकांच्या पैशाची उधळपट्टी असताना देखील सत्ताधारी सत्तेच्या जोरावर ही जागा घेऊ पहात असल्याने याला विरोध दर्शविण्याकरिता सोमवारी शिवाजी चौकात सर्व पक्षियांच्या वतीने भर पावसात धरणे आंदोलन करण्यात आले. याबाबतचे निवेदन स्विकारण्यासाठी मुख्याधिकारी न आल्याने आंदोलकांच्या वतीने मुख्याधिकारी कार्यालयाच्या दरवाजाला सदर निवेदन चिकटविण्यात आले. 

आरपीआयचे जिल्हाध्यक्ष सुर्यकांत वाघमारे, नगरसेविका शादान चौधरी, राष्ट्रवादीचे शहराध्यक्ष राजु बोराटी, महिलाध्यक्षा मंजुश्री वाघ, शिवसेना शहरप्रमुख सुनिल इंगूळकर, मनसेचे शहराध्यक्ष भारत चिकणे, आरपीआयचे शहराध्यक्ष कमलशिल म्हस्के, माजी नगरसेवक बाळासाहेब कडू, मधुकर पवार, नारायण पाळेकर, सनी पाळेकर, विद्यमान नगरसेवक दिलीप दामोदरे, सेजल परमार, अंजना कडू, गौरी मावकर, सिंधु परदेशी, कल्पना आखाडे, गणेश मावकर, मुकेश परमार, रवी पोटफोडे, श्वेता वर्तक, प्रदिप थत्ते, विजय आखाडे, राजेश मेहता, दीपक विकारी हे आंदोलनात सहभागी झाले होते.

लोणावळा धरणालगतचा सर्व्हे क्र. 39 (सिटी सर्व्हे क्र. 266) पैकी क्षेत्र 6800 चौरस मिटर ह्या बगीचा करिता आरक्षित असलेल्या जागेतून रेल्वेचे दोन हायटेन्शन , एक बाजुने रस्ता रुंदीकरणाकरिता 15 मिटर जागा व दुसरीकडे धरणाची हायफ्लड लाईन असल्याने निम्मी जागा बाधित झालेली आहे तसेच याठिकाणावर साडेआठ फुटांपेक्षा जास्त उंचीची झाडे लावण्यास टाटा कंपनीने मनाई केलेली असताना देखिल ही निकामी जागा खरेदी करण्याचा घाट सत्ताधारी मंडळींनी घातला आहे. सभागृहाने हा विषय मागील वर्षी बहुमताने फेटाळला असताना देखिल सत्ताधार्‍यांनी या ठरावाच्या विरोधात 308 दाखल करत तो विषय पुन्हा चर्चेच घेण्याचा चंग बांधला आहे. सदर जागा खरेदी करणे म्हणजे जनतेच्या पैशांची नासाडी असल्याने या विषयला शिवसेना, आरपीआय, काँग्रेस व अपक्ष अशा 11 नगरसेवकांनी सभागृहात विरोध केला तर भाजपाचे काहीजण तटस्त राहिले आहेत. वरील पक्षांनी त्यांची विरोधाची भुमिका कायम ठेवली असून राष्ट्रवादी काँग्रेस व मनसेने देखील या विषयात जनतेच्या हिताकरिता विरोधकांना साथ देत या एकाधिकारशाहीच्या विरोधात जनआंदोलन उभे करण्याचे जाहीर केले.

17 Jul 2018

एमपीसी न्यूज - लोणावळा शहरात 48 तासात लोणावळा तब्बल 447 मिमी पावसाची नोंद झाली आहे. रविवारी 285 मिमी व सोमवारी 162 मिमी पावसाची नोंद लोणावळ्यात झाली. आज मात्र पावसाचा जोर काहीसा मंदावला असून संततधार पावसाची जागा सरींनी घेतली आहे. शहरात या मौसमात आज अखेरपर्यंत 2553 मिमी पावसाची नोंद झाली आहे. मागील वर्षी शहरात आज अखेर 2290 मिमी पाऊस झाला होता. 

मागील बारा दिवसांपासून लोणावळ्यात सुरु असलेल्या पावसामुळे लोणावळ्यातील जनजिवन विस्कळीत झाले आहे. सकल भागातील अनेक रस्ते पाण्याखाली गेल्याने सुरक्षेच्या कारणास्तव आज मंगळवारी लोणावळ्यातील सर्व सरकारी व खाजगी शाळांना प्रशासनाकडून सुट्टी देण्यात आली.

लोणावळा शहरातील तुंगार्ली येथील एका सोसायटीमध्ये पाणी घुसले तर नांगरगाव, भांगरवाडी, गवळीवाडा, रायवुड, वलवण या भागातील रहदारीचे रस्ते पाण्याखाली गेल्याने नागरिकांना गैरसोयीचा सामना करावा लागला. रायवुड, जुना खंडाळा व पवनानगर मार्गावर झाडे पडल्याने वाहतुक काही काळ विस्कळीत झाली होती. भुशी धरणाच्या सांडव्यावरुन मोठ्या प्रमाणात पाणी वाहत असल्याने पर्यटकांनी खबरदारी घ्यावी अशा सुचना करण्यात आल्या आहेत.

16 Jul 2018

एमपीसी न्यूज - लोणावळा शहरातील अतिवृष्टीच्या पार्श्वभुमीवर विद्यार्थ्यांच्या सुरक्षेचा विचार करता शहरातील सर्व सरकारी व खाजगी शाळांना उद्या (मंगळवारीसुट्टी जाहीर करण्यात आली आहे. याबाबतची माहिती शिक्षण मंडळाच्या प्रशासन अधिकारी सुजाता देशमाने यांनी दिली. याबाबत सर्व शाळा मुख्यध्यापकांना सुचना देण्यात आल्या आहेत.

शनिवारी रात्रीपासून सुरु असलेल्या मुसळधार पावसाचा जोर आज देखिल कायम असून लोणावळा शहरात दिवसभरात 100 मिमी तर पवना धरण क्षेत्रात 130 मिमी पाऊस झाला आहे. मावळ तालुक्यासह पुणे जिल्ह्यात पावसाचा जोर वाढल्याने नदीकाठच्या गावांना सर्तक राहण्याचा इशारा देण्यात आला आहे. काही अपत्कालिन परिस्थितीचा सामना करण्याकरिता सर्व साधनसामुग्रीसह सर्तक रहा अशा सुचना पुणे जिल्हा सुरक्षा शाखेच्या वतीने सर्व पोलीस स्थानकांना देण्यात आल्या आहेत.

15 Jul 2018

एमपीसी न्यूज - मित्रांच्या समवेत भुशी धरण परिसरात फिरायला आलेल्या पर्यटकाचा भुशी धरणाच्या वरील बाजुला असलेल्या धबधब्यातून पडून मृत्यु झाला. तर तुंग किल्यावरुन 15 वर्षीय मुलीचा दरीत कोसळून मृत्य

राजीव तस्लिम शेख ( वय २० रा. परळी वैजनाथ सध्या राहणार म्हाळुंगे चाकण) असे लोणावळा येथील मयत पर्यटकाचे नाव आहे. आज दुपारी दोन वाजण्याच्या सुमारास ही दुर्घटना घडली.

मिळालेल्या माहितीनुसार राजीव हा त्याच्या पाच मित्रांच्या समवेत भुशी धरण परिसरात वर्षाविहारा करिता आला होता. भुशी धरणाच्या वरील बाजुला असलेल्या धबधब्यात ते भिजण्याचा आनंद घेत असताना राजीव धबधब्यात पडला व वाहून भुशी धरणात गेला. त्याच्या मित्रांनी आरडाओरडा केल्यानंतर स्थानिक जिवरक्षक साहेबराव चव्हाण, राजु पवार, दीपक कोळी ताेच शिवदुर्गच्या टिमने धरणाच्या पाण्यात शोध मोहिम राबवत सायंकाळी साडेपाच वाजण्याच्या सुमारास त्याचा मृतदेह पाण्यातून बाहेर काढला.

तुंग गडावरुन खाली उतरताना पाय घसरुन पडून एका ट्रेकर मुलीचा मुत्यु
 
पवनमावळ परिसरातील ऐतिहासिक किल्ले तुंग येथे आज (दि.१५)दुपारी तीन च्या सुमारास गडावरुन खाली उतरताना पाय घसरुन सुमारे पन्नास फुटाच्या अंतरावरुन खाली पडून ईशिता मुकुंद माठे ( वय. १५ रा.ए ६०४ सनसफायर बिल्डिंग मगरपट्टा जवळ हडपसर पुणे) या ट्रेकर मुलीचा मृत्यु झाला. इशिता मित्रमैत्रणी सोबत ट्रेकिंग साठी आज तुंग येथे आली होती.
 
 सकाळी अकराच्या सुमारास गडावर गेल्यानंतर सुमारे दोन वाजण्याच्या सुमारास खाली उतरताना पाय घसरुन तोल गेल्याने ती खाली दरीत पडली त्यामुळे मोठ्या प्रमाणावर डोक्यात मार लागल्याने तिचा जागीच मृत्यु झाला.
 
 लोणावळा ग्रामीण चे पोलीस हवालदार राकेश पांलाडे व सुनिल गवारी यांनी शिवदुर्ग मित्रच्या सहाय्याने घटनास्थळी शोध मोहिम राबवत इशिताचा मृतदेह बाहेर काढला.

 

15 Jul 2018
एमपीसी न्यूज - चालकाचे नियंत्रण सुटल्याने स्विफ्ट कार डिव्हायडर तोडून समोरून येणा-या कारला धडकली. हा भीषण अपघात आज (रविवारी) दुपारी तीनच्या सुमारास जुना पुणे-मुंबई महामार्गावर कार्ला फाट्याजवळ झाला. या अपघातात सात जणांचा जागीच मृत्यू झाला असून दोन जणांची प्रकृती अत्यवस्थ आहे.
 
 संजू मोहनसिंह खुशवाह (वय 17), कृष्णा रमेश शिरसाट (वय 22), निखिल बालाजी सरोदे (वय 20, सर्व रा. अमरदीप सोसायटी, रहाटणी, पुणे), राजू जगन्नाथ बहिरट (वय 52), सोनाली राजू बहिरट (वय 46), जान्हवी राजू बहिरट (वय 20), जगन्नाथ चंद्रसेन बहिरट (वय 82, सर्व रा. कलाशंकर नगर, मुंढवा, पुणे) अशी या अपघातात मृत्युमुखी पडलेल्यांची नावे आहेत. तर प्रतीक बालाजी सरोदे (वय 18), आकाश मदने (वय 17) आणि रोहित कड (वय 16) अशी जखमींची नावे आहेत.
पोलिसांनी दिलेल्या माहितीनुसार, सहा मित्र स्विफ्ट कारमधून लोणावळ्याच्या दिशेने जात होते. स्विफ्ट कार (एम एच 14 / सी एक्स 8339) कार्ला फाट्याजवळ आली असता चालकाचे नियंत्रण सुटल्याने कार डिव्हायडर तोडून विरुद्ध लेनवर गेली. दरम्यान नियंत्रण सुटलेली स्विफ्ट मुंबईहून पुण्याच्या दिशेने येत असलेल्या सँट्रो कारला (एम एच 12 / ई एक्स 1682) धडकली. दोन्ही कारचा वेग जास्त असल्याने दोन्ही कारचे मोठ्या प्रमाणात नुकसान झाले. या अपघातात स्विफ्ट कार मधील 3 जण तर सँट्रो कार मधील 4 जण जागीच ठार झाले आहेत. तर सँट्रो कारमधील दोन जणांना गंभीर दुखापत झाली आहे.
 
सँट्रो कारमधील बहिरट कुटुंबीय फॅमिली गेट टुगेदरच्या कार्यक्रमासाठी दोन कार मधून लोणावळ्याला गेले होते. लोणावळ्याहून कार्यक्रम उरकून परत येत असताना कार्ला फाट्याजवळ हा अपघात झाला. अपघात झालेल्या कारच्या मागे बहिरट कुटुंबीयांची दुसरी कार होती. पहिल्या कारचा अपघात झाल्याचे मागील कारमधील कुटुंबीयांनी प्रत्यक्ष बघितले. अपघातानंतर पुण्याकडे जाणार्‍या मार्गावर सुमारे दोन किमी अंतरापर्यत वाहनांच्या रांगा लागल्या होत्या.
 
या अपघातात दोन्ही वाहनांचा अक्षरशः चक्काचुर झाल्याने दोन्ही गाडीमधील मयत व जखमी हे गाड्यांमध्येच आडकले होते. अपघाताची माहिती समजल्यानंतर लोणावळा ग्रामीणचे पोलीस निरीक्षक रामदास इंगवले व कर्मचारी तसेच रस्ते विकास महामंडळाचे देवदुत पथक व आयआरबीच्या कर्मचार्‍यांनी घटनास्थळी धाव घेत कटर मशिन व गॅस कटरच्या सहाय्याने गाड्यांचा पत्रा कापत जखमी व मयत यांना बाहेर काढले. अपघातानंतर दोन्ही वाहने बराच काळ रस्त्याच्या मधेच राहिल्याने पुण्याकडे जाणार्‍या मार्गावर सुमारे दोन किमी अंतरापर्यत वाहनांच्या रांगा लागल्या होत्या.
15 Jul 2018
एमपीसी न्यूज -  लोणावळा परिसरात मध्यरात्रीपासून पावसाचा जोर वाढल्याने डोंगरभागातून वेगाने धबधबे वाहू लागले आहेत. पर्यटकांचे आकर्षण असलेल्या भुशी धरणाच्या सांडव्यावरुन वेगाने पाणी वाहू लागल्याने पर्यटकांना धरणाच्या पायर्‍यांवर जाणे व बसणे मुश्किल झाल्याने पर्यटकांची घोर निराशा झाली. पर्यटकांच्या सुरक्षेकरिता या ठिकाणी लोणावळा शहर पोलिसांनी मोठा बंदोबस्त तैनात ठेवला आहे. 
 
तसेच शनिवार व रविवार सुट्टीच्या दिवसात सायंकाळी पाचनंतर भुशी धरणाकडे जाणारा मार्ग पर्यटकांकरिता बंद करण्याचा निर्णय पोलीस प्रशासनाने जाहीर केल्यानंतर या धरणावर वर्षाविहाराचा आनंद घेण्याकरिता आज सकाळपासूनच धरणावर पर्यटकांनी गर्दी केली होती. मात्र, मध्यरात्रीपासून पावसाचा जोर वाढल्याने धरणाच्या सांडव्यावरुन वेगाने पाणी पायर्‍यांवर येऊ लागल्याने या पायर्‍यांपर्यंत जाणे व त्यावर बसणे मुश्किल झाल्याने या ठिकाणी आलेल्या पर्यटकांची निराशा झाली. 

14 Jul 2018
एमपीसी न्यूज -  वलवण गावातील पांडूरंग सावळाराम पाळेकर यांचे आज वृध्दपकाळाने निधन झाले. ते 80 वर्षाचे होते. त्यांच्या पश्च्यात पत्नी, दोन भाऊ यासह लोणावळा एज्युकेशन ट्रस्टचे सचिव व माजी नगरसेवक दत्तात्रय पाळेकर, कामगारनेते अॅड. विजयराव पाळेकर, मावळ तालुका कबड्डी असोशिएशनचे अध्यक्ष रमेश पाळेकर, उद्योजक सुनिल पाळेकर ही चार मुले, सुना, नातवंड, पतवंड असा मोठा परिवार आहे. 
Page 1 of 55

Like what you see?

Close

Hit the buttons below to follow us

0
Shares