22 May 2018

एमपीसी न्यूज - गुन्हे शाखेचे पोलीस असल्याचे सांगून तिघांना राहत्या घरातून पळवून नेल्याचा प्रकार समोर आला होता. मात्र 'ते' पोलीस खरेखुरे पोलीस असून त्यांच्याकडे न्यायालयीन आदेश असल्याची माहिती पोलिसांनी दिली.

निलभ रतन (वय 27), रोमा सिंग (वय 26) आणि दर्श (वय 5) यांना उत्तर प्रदेश पोलीस चौकशीसाठी घेऊन गेले आहेत.

पोलीस निरीक्षक (गुन्हे) रंगनाथ उंडे यांनी दिलेल्या माहितीनुसार, निलभ विरोधात उत्तरप्रदेश मधील इंद्रपूरम पोलीस ठाण्यात रोमा आणि दर्श या दोघांना पळवून आणल्याचा गुन्हा दाखल आहे. त्या गुन्ह्याचा तपास करत उत्तर प्रदेश पोलिसांच्या गुन्हे शाखेच्या पोलिसांनी निलभ याच्यासह रोमा आणि दर्श यांना देखील ताब्यात घेतले. गुन्हा नोंद असलेल्या पोलीस ठाण्याच्या हद्दीबाहेर तपास करताना तेथील स्थानिक पोलिसांना कळविणे आवश्यक आहे. या घटनेत उत्तर प्रदेश पोलिसांनी ही कारवाई करताना स्थानिक पोलिसांना म्हणजेच हिंजवडी पोलिसांना याबाबत कळविले नाही. त्यामुळे हिंजवडी पोलिसांना याबाबत काहीच समजू शकले नाही. यापूर्वी देखील तोतया पोलीस बनून काही गुन्हेगारांनी नागरिकांना त्रास दिल्याच्या घटना घडल्या आहेत. त्यामुळे हिंजवडी पोलिसांनी हा गुन्हा दाखल करून घेतला. या गुन्ह्याचा तपास करत असताना 'ते' पोलीस तोतया नसून ते खरेखुरे पोलीस असल्याचे निष्पन्न झाले आहे. हिंजवडी पोलीस तपास करीत आहेत.

22 May 2018

दीनानाथ मंगेशकर रुग्णालयातील प्रकार

एमपीसी न्यूज - पेशंट महिलेचा उपचारादरम्यान मृत्यू झाल्याने त्याला जबाबदार डॉक्टर आहेत असे समजून पुण्यातील प्रसिध्द दीनानाथ मंगेशकर रुग्णालयातील डॉक्टरला धक्काबुक्की केली तर रुग्णालयाची तोडफोडही केली. सोमवारी (21 मे) पहाटे दीड वाजण्याच्या सुमारास हा प्रकार घडला.

याप्रकरणी विठ्ठल बबन वाघमारे (वय-39), सिध्देश्वर तानाजी गायकवाड (वय-24) आणि अनिकेत भारत रणदिवे (वय-24, सर्व रा. तळजाई वसाहत, पुणे) यांना अलंकार पोलिसांनी अटक केली. तर आणखी आठ ते दहा जणांवर गुन्हा दाखल केला आहे. याप्रकरणी दीनानाथ मंगेशकर रुग्णालयाचे कर्मचारी नितीन महाबळ (वय-38, रा.कोथरूड) यांनी फिर्याद दिली आहे.

पोलिसांनी दिलेल्या माहितीनुसार, आरोपी दत्ता वाघमारे यांची पत्नी आजारी असल्यामुळे त्यांना दीनानाथ मंगेशकर रुग्णालयात दाखल करण्यात आले होते. दरम्यान उपचार सुरू असताना रविवारी (20 मे) त्यांचा मृत्यू झाला. पत्नीच्या मृत्युला उपचार करणारे डॉ. चेतन महाबळ जबाबदार असल्याचे समजून आरोपींनी त्यांना धक्काबुक्की केली आणि रुग्णालयाची तोडफोड केली. फिर्यादीनंतर अलंकार पोलिसांनी गुन्हा दाखल करून तिघांना अटक केली आहे. अधिक तपास पोलीस उपनिरीक्षक एस.डी.जाधव करीत आहेत.

22 May 2018

एमपीसी न्यूज - घऱफोडीच्या गुन्ह्यात अटक असलेल्या आरोपीने कोंढवा पोलीस स्टेशनच्या तपास पथकाच्या रुममधील खिडकीला धडक मारून आत्महत्या करण्याचा प्रयत्न केला. हा प्रकार सोमवारी (21 मे) सायंकाळी साडेपाच वाजण्याच्या सुमारास घडला.

रफिक हुसेन शेख (वय-23, रा.भाग्योदयनगर, कोंढवा-खुर्द) असे आरोपीचे नाव आहे.

पोलिसांनी दिलेल्या माहितीनुसार, आरोपी रफिक शेख याला घरफोडीच्या गुन्ह्यात कोंढवा पोलिसांनी अटक केली होती. न्यायालयाने त्याला तीन दिवसांची पोलीस कोठडी सुनावली होती. पोलीस कोठडीदरम्यान त्याने आणखी काही घरफोड्या केल्याची कबुली दिली होती. त्या गुन्ह्यात त्याला अटक करण्याची प्रक्रीया सुरू असताना आरोपीने "मला घरी जाऊ द्या" अशी मागणी करत खिडकीच्या काचेला जोरात धडक मारली. यामध्ये त्याच्या कानाला आणि गालाला इजा झाली आहे. अधिक तपास पोलीस उप निरीक्षक शिंदे करीत आहेत.

22 May 2018

एमपीसी न्यूज - पुणे शहरातील लोहगाव परिसरातून सोळा आणि सतरा वर्षीय दोन तरुणी बेपत्ता झाल्या आहेत. याप्रकरणी सदर मुलींच्या कुटुंबीयांनी फिर्याद दिली असून विमानतळ पोलीस ठाण्यात गुन्हे दाखल करण्यात आले आहेत.

पहिल्या घटनेत गुरुद्वारा वस्ती, लोहगाव येथे वास्तव्यास असलेली काजल शिवाजी धंगेकर (वय-17) ही मुलगी 17 मे रोजी सकाळी साडेदहा वाजता वाडीया कॉलेजला कामासाठी जात असल्याचे सांगून घराबाहेर पडली. ती अद्यापही परत आली नाही. याप्रकरणी तिच्या आईने फिर्याद दिली आहे.

दुस-या घटनेत शिवकॉलनी, साठेवस्ती लोहगाव येथील संजना संजय भारती (वय-16) ही तरुणी 14 मे रोजी मैत्रिणीसोबत बाजारात जाते असे सांगून घराबाहेर पडली ती अद्यापही घरी परत आली नाही.याप्रकरणी तिच्या वडिलांनी फिर्याद दिली असून अज्ञात इसमावर पळवून नेल्याप्रकरणी गुन्हा दाखल करण्यात आला आहे.

22 May 2018

एमपीसी न्यूज- एका मद्यपी टुरिस्ट कारचालकाने रस्त्यावरून जाणाऱ्या दोन दुचाकींना आणि एका दाम्पत्याला उडविले. या अपघातात दाम्पत्य गंभीर जखमी झाले आहे. ही घटना आज रात्री आठच्या सुमारास सिद्धीविनायकनगरी निगडी अप्पूघरजवळ घडली. पोलीस घटनास्थळी दाखल झाले आहेत. चालकाने मद्यपान केले असल्याचे पोलिसांचे म्हणणे आहे.

प्राथमिक माहितीनुसार, दारू पिऊन एका टुरिस्ट कार चालकाने रस्त्यावरून जाणाऱ्या दोन दुचाकींना आणि एका दाम्पत्याला उडविले. या अपघातात, सतीश देवकर आणि त्यांच्या पत्नी गंभीर जखमी झाल्या असून दुचाकीवरून जाणारे चंद्रकांत बिराजदार यांच्या दुचाकीला धडक दिल्याने त्यांच्या दुचाकीचे नुकसान झाले आहे.

22 May 2018

एमपीसी न्यूज - पोटच्या अल्पवयीन मुलीचा विनयभंग करणा-या नराधम बापाला अटक करण्यात आली आहे. विनयभंगाचा प्रकार रविवारी (दि. 20) वडारवाडी येथे दुपारी एकच्या सुमारास घडला.

याप्रकरणी 32 वर्षीय महिलेने चतु:श्रृंगी पोलीस ठाण्यात फिर्याद दिली. त्यानुसार पोलिसांनी 34 वर्षीय नराधम बापाला अटक केली आहे.

पोलिसांनी दिलेल्या माहितीनुसार, रविवारी दुपारी फिर्यादी महिला काही कामानिमित्त बाहेर गेल्या होत्या. दरम्यान त्यांची 14 वर्षाची मुलगी घरात एकटी होती. मुलगी एकटी असल्याचा फायदा घेत नराधम बापाने तिचा विनयभंग केला. फिर्यादी महिला घरी आल्यानंतर झालेला सर्व प्रकार त्यांना समजला. यावरून आरोपीने पोटच्या पीडित मुलीवर लैंगिक अत्याचार करून जीवे मारण्याची धमकी दिली. यावरून महिलेने चतुःशृंगी पोलीस ठाण्यात फिर्याद दिली. पोलिसांनी नराधम बापाला अटक केली आहे. चतुःशृंगी पोलीस तपास करीत आहेत.

22 May 2018
एमपीसी न्यूज - कात्रज चौकात असलेल्या एचडीएफसी बँकेच्या एटीएमला सेंटरला आज (मंगळवार) दुपारच्या सुमारास आग लागली. या आगीत एटीएम सेंटरचे काही प्रमाणात नुकसान झाले आहे. दरम्यान आग लागल्याची वर्दी मिळताच  अग्निशामक दलाच्या जवानांनी घटनास्थळी धाव घेत आगीवर नियंत्रन मिळवले. 
कात्रज चौकातील मोरे बागेजवळ हे एचडीएफसी बँकेचे एटीएम आहे. आज दुपारच्या सुमारास या एटीएमला अचानक आग लागली. काही वेळातच ही आग पसरली आणि एटीएममधील बॅटरी बॅकअप, एसी व कंट्रोल पॅनेल या आगीत जळाले आहेत.  सुदैवाने एटीएम मशीनला आग लागली नसल्यामुळे आतील पैसे सुरक्षित आहेत, अशी माहिती अग्निशामक दलाच्या वतीने देण्यात आली.
22 May 2018

अटक आरोपी मराठी चित्रपट निर्माता 

एमपीसी न्यूज - प्रियकराच्या मदतीने पतीचा खून करून मृतदेहाची विल्हेवाट लावल्याचा प्रकार उघडकीस आला आहे. दोन अंगरक्षकांच्या मदतीन प्रेयसीच्या पतीचा गोळ्या झाडून खून केला. या प्रकरणी पनवेल पोलिसांनी संबंधीत प्रियकराला अटक (वय, 37) केली असून तो मराठी चित्रपटांचा निर्माता आहे. तर पत्नी फरार असून पोलीस तिचा शोध घेत आहे. 

पनवेलला पोलिसांना 28 एप्रिलला पनवेल-माथेरान रोडवर एक मृतदेह सापडला. मात्र, मुंबई मधील बेपत्ता झालेल्यांपैकी कोणत्याही व्यक्तिशी मृतदेहाचे वर्णन जुळत नव्हते. यावेळी पुण्यातील येरवडा पोलीस ठाण्यात एक व्यक्ति बेपत्ता असल्याची तक्रार नोंदवण्यात आली होती. याच्याशी या मृतदेहाचे वर्णन जुळले. त्या व्यक्तिच्या नातेवाईकांशी संपर्क साधला असता भावाने मृतदेहाची ओळख पटवली. 

दरम्यान, अधिक तपास केला असता मयत व्यक्ति आणि त्याची पत्नी यांच्यामध्ये सतत वाद होत असल्याची माहिती समोर आली. घटनेच्या दिवशी मयत आणि त्याची मुंबईला काकींकडे जात असल्याचे सांगून निघाले. मात्र, मयत व्यक्ती घरी न येता फक्त त्याची पत्नीच घरी पोहोचली होती. यावेळी ते मुंबईला गेलेच नाही, असा बनाव तिने घरच्यांसमोर केला. मात्र, ही माहिती जुळत नसून मोबाईल लोकेशनद्वारे तपासले असता मयत व्यक्ती आणि पत्नी दोघेही मुंबईला गेल्याचे निष्पन्न झाले. अधिक तपासात काकीच्या नव-यासोबत मयताच्या पत्नीचे प्रेमसंबंध असल्याचे समोर आले. तो मराठी चित्रपटांचा निर्माता असून त्याने दोन मराठी चित्रपट बनवले आहेत. सध्या तो एका हिंदी चित्रपटाच्या निर्मितीत गुंतला होता. 

या प्रेमसंबंधाची कुणकूण मयताला लागल्याने त्यांच्यामध्ये सतत भांडणे होत होती. घटनेच्या दिवशी आरोपीने दोघांनाही पनवेलला बोलावले होते. यावेळी आरोपी प्रियकराने अंगरक्षकाच्या बंदुकीने गोळ्या झाडून पुतण्याची हत्या केली. त्यानंतर दोन अंगरक्षकांच्या मदतीने पनवेल-माथेरान रोडवर निर्जन स्थळी मृतदेह फेकून दिला. दरम्यान, या कटात पत्नीही सहभागी असल्याचे निष्पन्न झाले आहे. सध्या ती फरार असून पोलीस तिचा शोध घेत आहे.

22 May 2018
एमपीसी न्यूज - वाकड परिसरातील सराईत गुन्हेगार गंग्या याला पोलिसांनी दीड वर्षांसाठी पुणे जिल्ह्यातून हद्दपार केले. 14 मे पासून त्याला हद्दपार करण्यात आले असून गंग्यावर मारामारी आणि सामाजिक शांतता भंग केल्याचे गुन्हे दाखल आहेत. 
 
रोहन उर्फ गंग्या वासुदेव वाघमारे (वय 23, रा. चौधरी पार्क पोल जवळ, वाकड) असे तडीपार केलेल्या आरोपीचे नाव आहे. 
 
पोलिसांनी दिलेल्या माहितीनुसार, मागील दोन वर्षांपासून गंग्याने वाकड परिसरात गंभीर गुन्हे केले. त्यामुळे परिसरात दहशतीचे वातावरण पसरले होते. याबाबत वरिष्ठ पोलीस निरीक्षक सतीश माने, पोलीस निरिक्षक (गुन्हे) सुनील पिंजण यांच्या मार्गदर्शनाखाली पोलीस हवालदार सुहास पाटोळे आणि पोलीस शिपाई नाना झेंडे यांनी गंग्याने केलेल्या गुन्ह्यांचे रेकॉर्ड तयार करून त्याच्या हद्दपारीचा प्रस्ताव पोलीस उपायुक्त कार्यालयाकडे सादर केला. त्यानुसार परिमंडळ तीनचे पोलीस उपायुक्त गणेश शिंदे यांनी हा प्रस्ताव मंजूर करत गंग्याला 14 मे 2018 पासून दीड वर्षांसाठी तडीपार केले.
22 May 2018

एमपीसी न्यूज - पुणे-मुंबई द्रुतगती मार्गावर अमृतांजन पुलाजवळील तीव्र उतारावर भरधाव वेगातील टेम्पो चाकलाचे गाडीवरील नियंत्रण सुटल्याने टेम्पोने रस्त्याच्या कडेला उभ्या असलेल्या ट्रकला मागून जोरदार धडक दिली. या अपघातात टेम्पो चालकाचा जागीच मृत्यू झाला. आज पहाटे चार वाजून 50 मिनिटाच्या सुमारास हा अपघात झाला. 

चालकाचे नाव अद्याप समजले नसून वय अंदाजे 26 वर्ष आहे. 

मिळालेल्या माहितीनुसार, आज पहाटे टेम्पो (एमएच 433130) मुंबईकडे जात होता. यावेळी अमृतांजन पुलाजवळ आला असता टेम्पो चालकाचे टेम्पोवरील नियंत्रण सुटून रस्त्याच्या बाजूला उभ्या असलेल्या ट्रकला (केए 56-3299) पाठीमागून जोरदार धडक दिली. यामध्ये टेम्पोचा समोरील भागाचा चुराडा होऊन चालकाच्या छातीत याचा जबर मार लागल्याने त्याचा जागीच मृत्यू झाला. दरम्यान, खंडाळा पोलिसांनी चालकाचा मृतदेह शवविच्छेदनासाठी खंडाळा येथील सरकारी रुग्णालयात दाखल केला. चालकाला बहुतेक झोपेचा झपका आल्याने अपघात झाल्याची शक्यता पोलिसांनी व्यक्त केली आहे.

khandala accident

khandala accident 1

22 May 2018

एमपीसी न्यूज - आयटी कंपनीत काम करणाऱ्या तरुणीने गळफास घेऊन आत्महत्या केली. ही घटना सोमवारी (दि. 21) रात्री दहाच्या सुमारास मारुंजी येथे घडली. 

पूजा नागनाथ वाघमारे (वय 23, रा. मारुंजी, ता. मुळशी, मुळगाव - सोलापूर), असे आत्महत्या केलेल्या तरुणीचे नाव आहे. 

पोलिसांनी दिलेल्या माहितीनुसार, पूजा हिंजवडी येथील एका आयटी कंपनीत काम करीत होती. तिने सोमवारी मारुंजी येथील राहत्या घरात गळफास घेतल्याचे आढळून आले. याबाबत मारुंजी परिसरातील रहिवासी सुनील अंकुश जाधव यांनी हिंजवडी पोलिसांना खबर दिली. हिंजवडी पोलिसांनी पूजाचा मृतदेह शवविच्छेदनासाठी पिंपरी मधील यशवंतराव चव्हाण स्मृती (वायसीएम) रुग्णालयात पाठविण्यात आला. मात्र, आत्महत्येचे नेमके कारण अद्याप समजू शकले नाही. हिंजवडी पोलीस तपास करीत आहेत.

22 May 2018

एमपीसी न्यूज - जेसीबीचे काम सुरु असलेल्या ठिकाणी आपला बॉल आणण्यासाठी गेलेल्या मुलाला जेसीबी मालकाने जेसीबीच्या पुढच्या बकेटमध्ये बसवून त्याला नागझरीच्या नाल्यात टाकण्याचा प्रयत्न करण्याती आल्याचा धक्कादायक प्रकार उघडकीस आला आहे. तसेच जेसीबी चालक या सगळ्यांचे शुटिंग करीत मुलाला भीती दाखवत मनोरंजन करत होता. दरम्यान, दोघांवर अद्यापही कारवाई करण्यात आलेली नाही. 

सार्थक लिंबोने, असे या लहान मुलाचे नाव आहे. 

मिळालेल्या माहितीनुसार, सार्थक हा दोन दिवसांपूर्वी नागझरी नाल्याच्या जवळच्या परिसरात खेळत होता. या ठिकाणी महापालिकेकडून जेसीबीद्वारे नाल्याच्या सफाईचे काम सुरू होते. दरम्यान, काम सुरू असलेल्या ठिकाणी या सार्थकचा बॉल गेल्याने तो आणण्यासाठी तिथे आला असता जेसीबी मालकाने हळूच येऊन त्याला जेसीबीच्या बकेटमध्ये उचलले. या प्रकारामुळे सार्थक प्रचंड भेदरून गेला होता. यावर कळस गाठत जेसीबी चालक या सर्व प्रकाराचं मोबाईलमध्ये शुटिंग करीत मनोरंजन करीत होता. 

घाबरलेल्या सार्थकने दोन दिवस घरी काहीही सांगितले नाही. हा व्हिडिओ व्हायरल झाल्यानंतर ही माहिती उघड झाली. तसेच अद्यापही या दोघांवर कारवाई करण्यात आलेली नाही. त्यामुळे नागरिकांमधून संताप व्यक्त करण्यात येत आहे. पालिकेने नालासफाईचे टेंडर दिले आहे का मुलांना नाल्यात फेकण्याचे टेंडर दिले आहे, मुलाच्या जीवाचे काही बरे वाईट झाले असते तर त्याची जबाबदारी कोणी घेतली असती, असे संतप्त प्रश्न नागरिकांधून उपस्थित होत आहे.

21 May 2018

एमपीसी न्यूज - महिलांचे सोशल मीडियावरील अकाउंट हॅक करून त्यांच्या अकाउंटवरून अश्लील मेसेज पोस्ट करायचा. टाकलेल्या पोस्ट डिलीट करण्यासाठी संबंधितांकडून पैशांची मागणी करणा-या आरोपीला सायबर क्राईम पोलिसांनी अटक केली.

याप्रकरणी पिंपळे सौदागर भागातील एका महिलेने फिर्याद दिली. त्यानुसार कृष्णा बळीराम फड (रा. जगदीश खानावळ चाळ, खानावळकर आली, पनवेल, जि. रायगड) याला अटक करण्यात आली आहे.

पोलिसांनी दिलेल्या माहितीनुसार, कृष्णा याने फिर्यादी महिलेचे इंस्टाग्राम, स्नॅपचॅट, फेसबुक इत्यादी सोशल मीडिया अकाउंट हॅक केले. त्यावरून अश्लील व बदनामीकारक मेसेज पोस्ट केले. पोस्ट करण्यात आलेले मेसेज काढण्यासाठी त्याने फिर्यादी महिलेकडे 15 हजार रुपयांची मागणी केली. तसेच पैसे न दिल्यास हे अकाउंट बंद न करता त्यावर आणखी बदनामीकारक मेसेज टाकण्याची धमकी दिली. महिलेने तक्रार दिल्यानंतर पुणे सायबर क्राईम पोलिसांनी कसून तपास करत कृष्णाला अटक केली. कृष्णाकडे कसून चौकशी केली असता, त्याने त्याच्या ओळखीच्या आणखी सहा मुलींचे अकाउंट हॅक करून त्यावरून बदनामीकारक मेसेज पोस्ट करून त्यांच्याकडेही पैसे मागितल्याचे निष्पन्न झाले. पोलिसांनी कृष्णाला अटक करून त्याला सांगवी पोलिसांच्या ताब्यात दिले आहे. तसेच त्याने ज्या मुलींच्या अकाऊंटवरून बदनामीकारक मेसेज पोस्ट केले आहेत, त्यांना देखील संबंधित पोलीस ठाण्यात तक्रार देण्याच्या सूचना देण्यात आल्या आहेत.

गतवर्षी पुणे शहर सायबर क्राईम पोलिसांकडे 606 तक्रारी अर्ज आले होते. तर 2018 या वर्षात आजवर 189 तक्रारी अर्ज आले आहेत. अशाप्रकारे महिलांची बदनामी, अश्लील मेसेज पोस्ट करण्याचे प्रकार घडल्यास तसेच पैशांची मागणी केल्यास त्याबाबत तात्काळ सायबर क्राईम सेल पुणे शहर यांच्याशी संपर्क करावा, असे आवाहन सायबर क्राईम पोलिसांकडून करण्यात आले आहे. ही कामगिरी पोलीस उपनिरीक्षक रुपाली पवार, मंदा नेवसे, महिला पोलीस शिपाई उमा पालवे, ज्योती दिवाणे, पोलीस शिपाई शाहरुख शेख, योगेश वाव्हळ यांच्या पथकाने केली.

21 May 2018

एमपीसी न्यूज - दारू पिऊन गोंधळ घालणे सहा आयटी अभियंत्यांना चांगलेच महागात पडले आहे. दारू पिऊन गोंधळ घालणा-या या अभियंत्यांना समज देण्यासाठी गेलेल्या पोलीस कर्मचा-यांना धक्काबुक्का केल्याप्रकरणी पोलिसांनी या सहा तरुणांना बेड्या ठोकल्या आहेत. ही घटना पुण्यातील उच्चभ्रु समजल्या जाणा-या अॅमनोरा पार्क परिसरात शनिवारी (19 मे) रात्रीच्या सुमारास घडली.

उत्कर्ष शर्मा (वय-24), चंदन भंडारी (वय-24), रोहित वांगणू (वय-30), अभिषेक जेमिनी (वय-24) आणि अमनदीप शर्मा (वय-27, रा. व्ही कंट्री टॉवर, अमनोरा, हडपसर) आणि राकेश शर्मा (वय-28, रा.निसर्ग सिटी, काळेवाडी फाटा, वाकड) अशी अटक आरोपींची नावे आहेत. याप्रकरणी पोलीस शिपाई हनुमंत दुधभाते यांनी हडपसर पोलीस ठाण्यात फिर्याद दिली आहे.

याप्रकरणी अधिक माहिती अशी की, अमनोरा पार्क परिसरातील व्ही कंट्री टॉवरमध्ये आरोपी रोहित वांगणू याचा फ्लॅट आहे. या फ्लॅटमध्ये तो आणि त्याचे पाच मित्र शनिवारी रात्री पार्टीसाठी एकत्र जमले होते. त्यांनी दारू प्यायल्यानंतर गोंधळ घातल्याने काही नागरिकांनी नियंत्रण कक्षाकडे याची तक्रार केली. यानंतर पोलीस शिपाई दुधभाते आणि गायकवाड तेथे गेले असता आरोपी तरुणांनी त्यांना धक्काबुक्की करत हुज्जत घातली. त्यावेळी या कर्मचा-यांनी हा प्रकार आपल्या वरिष्ठांना सांगितला. त्यानंतर आणखी काही पोलीस कर्मचारी आले आणि या तरुणांना अटक करून घेऊन गेले. अधिक तपास सहायक पोलीस निरीक्षक के. एस. लोंढे करत आहेत.

21 May 2018

एमपीसी न्यूज - बंदोबस्तावर असलेल्या पोलीस कर्मचा-यांची नजर चुकवून ससून रुग्णालयातून पळून गेलेल्या आरोपीला पोलिसांना ताब्यात घेतले आहे. उरुळी गावाजवळून पोलिसांनी त्याला अटक केली आहे. अक्षय अशोक लोणारे (वय-21, रा.येरवडा कारागृह) असे आरोपीचे नाव आहे. कोंढवा पोलिसांनी त्याला बलात्काराच्या गुन्ह्यात अटक केली होती. आरोपीला मानसिक आजार असल्यामुळे त्याला ससून रुग्णालयात दाखल केले होते. परंतु रविवारी सकाळी तो ससून रुग्णालयातून पळून गेला होता.

आरोपी अक्षय लोणारे याच्यावर 2015 मध्ये अल्पवयीन मुलीवर बलात्कार केल्याप्रकरणी कोंढवा पोलिसांत गुन्हा दाखल आहे. सध्या तो न्यायालयीन कोठडीत होता. त्याच्यावर असलेल्या गुन्ह्याच्या खटल्याची सुनावणी सुरू होऊन साक्षी, पुरावे तपासून तो अंतिम टप्प्यात आला आहे. दरम्यान अक्षयला मानसिक आजार असून उपचारासाठी त्याला ससून रुग्णालयात भरती केले होते.

शनिवारी आणि रविवारी पोलीस नाईक निकम आणि शिपाई पांचाळ, कुंभार आणि खेंदाड हे चार पोलीस कर्मचारी बंदोबस्तावर होते. दरम्यान रविवारी सकाळच्या सुमारास खेंदाड आणि निकम हे चहा पिण्यासाठी गेले होते आणि कुंभार लघुशंकेसाठी गेले होते. या दरम्यान अक्षयने पांचाळ यांची नजर चुकवून पळ काढला.

21 May 2018
एमपीसी न्यूज - पिरंगूट घाटातील म्हसोबा देवाच्या मंदिरात चोरी झाल्याची घटना उघडकीस आली आहे. रविवारी (20 मे) पहाटे पावणेतीन ते साडेतीनच्या सुमारास दोन चोरट्यांनी खिडकीचे गज कापून आत प्रवेश केला आणि दानपेटीतील रोख रक्कम आणि देवाचे दागीने चोरून मेले. मंदिरात असलेल्या सीसीटीव्हीमध्ये हा सर्व प्रकार कैद झाला आहे. 
 
पोलिसांनी दिलेल्या माहितीनुसार, रविवारी पहाटेच्या सुमारास दोन चोरटे खिडकीचे गज कापून मंदिरात शिरले आणि त्यांनी देवाचे दागिने आणि दानपेटीतील रोख रक्कम चोरून नेली आहे. चोरट्यांनी अंदाजे 10 हजाराचा ऐवज चोरून नेल्याचा अंदाज आहे. मंदिराच्या आवारात असलेल्या सीसीटीव्ही फुटेजवरून दोन चोरटे असल्याचे दिसत आहे. याप्रकरणी पौड पोलीस ठाण्यात गुन्हा दाखल करण्यात आला आहे.
21 May 2018
एमपीसी न्यूज - नर्मदेच्या पाण्याने मला अखेरची अंघोळ घाला आणि नर्मदेच्या तीरावर असलेल्या मंडलेश्वर येथे माझ्यावर अंत्यसंस्कार करा, असे लिहून युवकाने आत्महत्या केली. ही घटना चिंचवड येथे सोमवारी (दि. 21) सकाळी सहाच्या सुमारास घडली. 
 
जतीन धनंजय जहागीरदार (वय 34, रा. चिंचवडगाव), असे आत्महत्या केलेल्या तरुणाचे नाव आहे. 
 
प्रत्यक्षदर्शींनी दिलेल्या माहितीनुसार, जतीन यांनी चिंचवडगाव येथील राहत्या घराच्या गच्चीवरील कठड्याला दोरी बांधून इमारतीवरून उडी मारली. यामध्ये त्यांचा मृत्यू झाला. इमारतीबाहेर मृतदेह लटकलेल्या अवस्थेत दिसल्याने परिसरातील नागरिकांनी अग्निशामक दलास याबाबत माहिती दिली. जतीन यांनी आपल्या आत्महत्येस कोणाला जबाबदार धरू नये. घरच्यांनी एकमेकांशी जुळवून घ्यावे. तसेच माझा माझ्या दुचाकीमध्ये जीव आहे. त्यामुळे ती विकू नये. अशी शेवटची इच्छा असल्याचे लिहून ठेवले आहे.
21 May 2018
एमपीसी न्यूज - कोंढवा पोलीस ठाण्यात बलात्काराचा गुन्हा दाखल असलेल्या आरोपीने ससून रुग्णालयातून पलायन केले. हा प्रकार रविवारी घडला. मानसिक आजार झाल्याने त्याला ससून रुग्णालयात दाखल करण्यात आले होते. 
 
अक्षय अशोक लोणारे (वय-21, रा.येरवडा कारागृह), असे पलायन केलेल्या आरोपीचे नाव आहे. पोलीस नाईक एस.एम.निकम यांनी याप्रकरणी बंडगार्डन पोलीस ठाण्यात फिर्याद दिली आहे. आरोपीवर 2015 मध्ये अल्पवयीन मुलीवर बलात्कार केल्याचा गुन्हा दाखल आहे. सध्या तो न्यायालयीन कोठडीत येरवडा कारागृहात होता. त्याच्यावर असलेल्या गुन्ह्याच्या खटल्याची सुनावणी सुरू होऊन साक्षी, पुरावे तपासून तो अंतिम टप्प्यात आला आहे. 
 
याप्रकरणी अधिक माहिती अशी की, अक्षयला मानसिक आजार असून उपचारासाठी त्याला ससून रुग्णालयात भरती केले होते. शनिवारी आणि रविवारी पोलीस नाईक निकम आणि शिपाई पांचाळ, कुंभार आणि खेंदाड हे चार पोलीस कर्मचारी बंदोबस्तावर होते. दरम्यान, रविवारी सकाळच्या सुमारास खेंदाड आणि निकम हे चहा पिण्यासाठी गेले होते आणि कुंभार लघुशंकेसाठी गेले होते. या दरम्यान अक्षयने पांचाळ यांची नजर चुकवून पळ काढला.
Page 1 of 166

Like what you see?

Close

Hit the buttons below to follow us

0
Shares